Էրեբունի վարչական շրջանում, Պարույր Սեւակի անվան դպրոցում տեղակայված 13/32 ընտրատեղամասում տատն ու թոռը միասին նույն ընտրախցում էին,եւ երբ Aravot.am-ը հանձնաժողովի նախագահին զգուշացրեց, որ դա օրենքի խախտում է, թոռն անմիջապես արձագանքեց, թե տատս ա, ինչ ա էդտեղ, համ էլ ես, որ մոտեցա, տատին արդեն ընտրությունն արել էր: Իսկ հանձնաժողովի նախագահն էլ արդարացավ, որ ուղղակի աչքից վրիպել է. «Դե ինչ պետք է լինի, եթե թերթիկն անվավեր համարեինք, նոր թերթիկ տայինք, ու նախօրոք արձանագրեինք, որ թոռն օգնելու է, մեկ ա նույն ընտրությունն էին անելու, այնպես որ…»:
Տատիկն էլ արդարանում էր հանձնաժողովի նախագահի մոտ, թե ինքն այսինչի սկեսուրն է, իրեն չե՞ն հիշում:
Այս ընտրատեղամասում զրուցեցինք նաեւ նախագահի թեկնածու Րաֆֆի Հովհաննիսյանի վստահված անձի հետ, որը վստահեցրեց, որ որեւէ խախտում չի արձանագրել:
Իսկ Հրանտ Բագրատյանն ու մյուս թեկնածուները, բացի Սերժ Սարգսյանից, վստահված անձինք չունեին:
Ընդհանրապես, այսօր մոտ 20 տեղամաս շրջելով, ընդամենը մի տեղամասում կար Հրանտ Բագրատյանի վստահված անձ, իսկ Սերժ Սարգսյանն ամեն տեղ էլ ուներ վստահված անձ, մնացած թեկնածուներն ընդհանրապես չունեին: Ի դեպ, որոշ տեղամասերում էլ Րաֆֆի Հովհաննիսյանի վստահված անձինք ուղղակի տեղում չէին:
Մանրամասները՝ տեսանյութում
Նելլի ԲԱԲԱՅԱՆ
