Հայաստանի Հելսինկյան կոմիտե իրավապաշտպան հասարակական կազմակերպության ղեկավար Ավետիք Իշխանյանն այսօր Մեդիա կենտրոնում լրագրողների հետ հանդիպմանը նշեց, որ կազմակերպությունը դիտորդական առաքելություն է իրականացնում Աջափնյակ համայնքում` 6-րդ ընտրատարածքում` 104 դիտորդով, որոնցից 8-ը շրջիկ դիտորդ է: «Այս ընտրությունների պարագայում կարելի է ասել, որ բոլոր տեղամասերում հանձնաժողովները միատարր են, գուցե որոշ տեղերում «Ժառանգության» ներկայացուցիչներ կան: Քանի որ ԲՀԿ-ն, Դաշնակցությունը եւ ՀԱԿ-ը չեն մասնակցում, հետեւաբար, հետաքրքրություն էլ չունեն: Ընդհանուր առմամբ` բացի Րաֆֆի Հովհաննիսյանից, այլ ընդդիմադիր թեկնածուներ գրեթե չունեն վստահված անձինք: Ըստ դիտորդների, տեղ- տեղ եղել են Հրանտ Բագրատյանի վստահված անձինք: Հավանաբար, չունեցողները համապատասխան ռեսուրսներ չունեն, ինչը մինչ քվեարկությունն էր ենթադրելի»:
Իշխանյանը նկատել է, որ բոլոր տեղամասերում վճռորոշ ձայնը ոչ թե հանձնաժողովի նախագահինն է, այլ՝ Սերժ Սարգսյանի վստահված անձինը. «Դիտորդները այդ մասին համապատասխան նշումներ են կատարել»:
Լուիզա ՍՈՒՔԻԱՍՅԱՆ
