Խախտումների վերաբերյալ բողոքներ չկան
Տավուշի մարզի թիվ 40 եւ 41 ընտրատարածքներում նախագահական ընտրությունները խաղաղ, առանց ընտրական օրենսգրքի խախտումների են ընթանում, ընտրատարածքային ընտրական հանձնաժողովները ժամը 16.30-ի դրությամբ ընտրական օրենսգրքի խախտումների վերաբերյալ ոչ մի բողոք կամ դիմում չեն ստացել: Այս մասին տեղեկացանք մարզի ընտրատարածքային ընտրական հանձնաժողովներից:
Ժամը 14-ի դրությամբ, թիվ 40 ընտրատարածքի (կենտրոնը՝ Նոյեմբերյան) ցուցակային 52 680 ընտրողներից քվեարկությանը մասնակցել է 22 771 ընտրող, կամ ցուցակային ընտրողների 43.23 տոկոսը: Տավուշի մարզի թիվ 41 ընտրատարածքում (կենտրոնը՝ Իջեւան) ժամը 14-ի դրությամբ ցուցակային 55812 ընտրողներից քվեարկությանը մասնակցել է 20112 ընտրող, կամ՝ ցուցակային ընտրողների 36.04 տոկոսը:
Ժամը 13-ի սահմաններում լինելով Նոյեմբերյան քաղաքի երաժշտական դպրոցում տեղակայված 40/03 ընտրական տեղամասում, տեսանք, որ այնտեղ թեկնածուների վստահված անձանցից ընտրությունների ընթացքին հետեւում է միայն Սերժ Սարգսյանի վստահված անձը: Այդ ընտրատեղամասում առավոտյան ընտրությունների ընթացքին հետեւել է նաեւ Պարույր Հայրիկյանի վստահված անձ Նազիկ Ղազինյանը, նախագահի այլ թեկնածուների վստահված անձինք հիշյալ ընտրական տեղամասում չեն գրանցվել:
Կարդացեք նաև
Ժամը 14-ի սահմաններում լինելով Նոյեմբերյանի մշակույթի տանը տեղակայված Տավուշի մարզի 40/01 ընտրական տեղամասում, տեղեկացանք, որ այնտեղ ընտրությունների ընթացքին հետեւում են Սերժ Սարգսյանի եւ Րաֆֆի Հովհաննիսյանի վստահված անձինք, իսկ Պարույր Հայրիկյանի վստահված անձ Նազիկ Ղազինյանը այնտեղ առավոտյան է հետեւել ընտրությունների ընթացքին: Նոյեմբերյանի հիմնական դպրոցում տեղակայված Տավուշի մարզի 40/02 ընտրական տեղամասում, ժամը 14.30-ի դրությամբ, ընտրությունների ընթացքին հետեւում էին միայն Սերժ Սարգսյանի վստահված անձը եւ Պարույր Հայրիկյանի վստահված անձ Նազիկ Ղազինյանը: Վերջինս ասաց, որ ինքը եղել է քաղաքի բոլոր՝ 3 ընտրական տեղամասերում: Նոյեմբերյան քաղաքի ընտրական տեղամասերում մենք տեղացի կամ արտասահմանցի դիտորդներ չտեսանք:
40/02 ընտրական տեղամասում ասացին, որ այստեղ եղել են տեղական դիտորդական մի կազմակերպության ներկայացուցիչներ: Մեր տեղեկություներով՝ թիվ 40 ընտրատարածքում ընդգրկված փոքրիկ Լճկաձոր գյուղում ներկա են եղել միջազգային դիտորդական 3 կազմակերպությունների ներկայացուցիչներ: Թե ինչու են նրանք դիտարկման համար ընտրել Լճկաձոր համայնքը՝ մեզ հայտնի չէ:
Ոսկան ՍԱՐԳՍՅԱՆ
