ՀՀԿ-ի արձագանքը՝ կրկնակի քվեարկությունների եւ ընտրակաշառքների ահազանգերին
Այսօր, քվեարկությունից հետո, լրագրողների հետ զրույցում ՀՀ նախագահի թեկնածու Հրանտ Բագրատյանը հայտարարել է իր շտաբի կողմից գրանցված մի շարք ընտրախախտումների մասին: Մասնավորաբար, ըստ նախագահի թեկնածուի, իրենց ունեցած տեղեկություններով՝ Ստեփանավանից, Գյումրիից մարդիկ են բերում մայրաքաղաք՝ լրացուցիչ ցուցակներով քվեարկելու, կրկնակի ընտրություն կատարելու համար: Թեկնածուն նաեւ ասել է, որ հօգուտ իշխանական թեկնածուի ընտրակաշառքներ են բաժանվել եւ այդ մասին ինքն իմացել է նաեւ քարոզարշավային փուլում՝ շրջաններում եղած ժամանակ:
Այս ամենի մասին, Aravot.am-ի հետ զրույցում ՀՀԿ մամուլի խոսնակ Էդուարդ Շարմազանովն ասաց. «Այս բոլոր հայտարարությունները, որտեղ խոսք է գնում եւ ոչ թե փաստ, այն մասին, որ կա ընտրախախտում, ես համարում եմ՝ անհեթեթ բամբասանք: Ավելին, երեկ նախագահի թեկնածու Սերժ Սարգսյանի շտաբը հանձնաժողովի երկու անդամների մեջտեղում նստելու վստահված անձի իր տեղը զիջել է թեկնածուներ Հրանտ Բագրատյանի եւ Րաֆֆի Հովհաննիսյանի ներկայացուցիչներին: Եթե իրենք մեր վստահված անձանց եւ հանձնաժողովին չեն վստահում, թող բարի լինեն գնան, նստեն եւ վերահսկեն: Ասելով չի, թող փաստեր ներկայացնեն: Չի սազում նախկին վարչապետին եւ նախագահի թեկնածուին՝ առանց փաստերի նման հայտարարություններ անել»:
Շարմազանովը նկատում է, որ ոստիկանությունը եւ դատախազությունը շատ օպերատիվ աշխատում են, յուրաքանչյուր լրագրող իրավունք ունի 24 ժամ գտնվել տեղամասում եւ նկարահանումներ իրականացնել: «Խախտում անելը խաղ ու պար չէ: Այնպես որ բամբասանք անելու փոխարեն, պարոն Բագրատյանը եւ Հովհաննիսյանը ճիշտ կանեն օգտվեն այն բարի կամքից, որը ցուցաբերել է նախագահի թեկնածու Սերժ Սարգսյանի նախընտրական շտաբը, թող օգտվեն այն նվերից, որն արել ենք մենք իրենց եւ վերահսկեն պրոցեսը»,- ասաց Էդուարդ Շարմազանովը՝ փաստելով, որ միայն ապացուցված խախտումների դեպքում ՀՀԿ շտաբը կարձագանքի:
Կարդացեք նաև
Նրա գնահատմամբ, մինչ այս պահը, որեւէ լուրջ ընտրախախտման դեպք, որը կարող է ազդել ընտրությունների արդյունքների վրա, չկա:
Նելլի ԳՐԻԳՈՐՅԱՆ
