ԿԸՀ աշխատակազմի իրավաբանական վարչության պետ Նունե Հովհաննիսյանը վստահեցնում է, որ թիվ մեկ ընտրատարածքի 1/6 տեղամասի քվեատուփի ճեղքի մասին ահազանգը կեղծ էր. «Այդ միջադեպի հետ կապված պետք է ասեմ, որ որեւէ ճեղք առկա չէ: Բոլոր քվեատուփերը նույնն են, թափանցիկ են եւ ներքեւի մասում ունեն փոքրիկ անցքեր, 4 անցք, եւ որեւէ ճեղք չկա»,- Aravot.am-ին ասաց տիկին Հովհաննիսյանը: «Քաղաքացիական հասարակության ինստիտուտ» հ/կ-ի դիտորդներն առավոտից ահազանգում են, որ տարբեր տեղամասերում հանձնաժողովների նախագահները տարբեր պատճառներով բացակայում են:
Տիկին Հովհաննիսյանից հետաքրքրվեցինք՝ նրանք դրա իրավունքն ունե՞ն եւ արդյոք նրանց բացակայությունը չի խանգարում ընտրական գործընթացին, տիկին Հովհաննիսյանն ասաց, որ նման ահազանգ չեն ստացել: Անդրադառնալով լցոնումների ու կուտակումների մասին ահազանգերին, նա ասաց, որ բաց քվեարկության մասին ահազանգը վերաբերել է թիվ 32 ընտրատարածքի տեղամասերին, բայց պարզվել է, որ բաց քվեարկություն չի եղել, այլ մի կին փորձել է հիվանդ մոր փոխարեն քվեարկել. «Ինչը կանխվել է հանձնաժողովի նախագահի կողմից: Վերջինս ոչ քվեաթերթիկ է ստացել, ոչ էլ քվեարկել է»:
Անդրադառնալով տեղամասերից մեկում կնոջ փոխարեն ամուսնու քվեարկությանը՝ ասաց. «Կինը ի վիճակի չի եղել, իսկ օրենքով թույլատրվում է օգնելը»:
Արփինե ՍԻՄՈՆՅԱՆ
