Ռուս-ադրբեջանցի հայտնի գրող Չինգիզ Հուսեյնովը «Վեստնիկ կավկազա» լրատվականի հետ զրույցում անդրադարձել է նաև ադրբեջանցի գրող Էքրեմ Էյլիսլիի շուրջ բարձրացած աղմուկին:
«Իմ վերաբերմունքը այս բոլոր իրադարձություններին շատ խճճված է: Էյլիսլին իմ ուսանողն է եղել և մենք շատ լավ հարաբերություններ ունեինք: Ես նրան շատ լավ եմ ճանաչում: Ինձ թվում է՝ նա գիտեր, թե ինչ է անում: Դուք կարող եք դա անվանել սադրանք, ՓԻԱՐ կամ վրդովեցուցիչ վարք, ինչպես կուզեք»:
Պատասխանելով հարցին, թե որն էր Էյլիսլիի նման գիրք գրելու նպատակը, Հուսեյնովն ասել է. «Ցավը և ճշմարիտ լինելու սեփական հավատը: Շատ գրողների պես նա էլ է կարծում, որ միայն ինքն է ճշմարիտ գրողը: Աղմուկից հետո ես աջակցում էի նրան, քանի որ ուզում էի պաշտպանել նրան և կարծում եմ, որ նրա գիրքը արվեստի հիանալի գործ է: Ես գրել էի, որ ցանկացած արվեստագետ իր տեսակետը հայտնելու իրավունք ունի, որ գիրքը Ղարաբաղի հակամարտության մասին փաստագրություն չէ, որ այն Հայաստանում ապրող ադրբեջանցիների մասին հետազոտություն չէ: Այնուամենայնիվ գիրքն այս հարցի հետ կապված հասարակության կարծիք է ձևավորել, սա կարող է մեզ օգնել ավելի լավ հասկանալ հակամարտության էությունը»:
Արդյոք Էյլիսլին ուզում էր այս գրքով իր շուրջ սկանդալ ստեղծել Հուսեյնովն ասել է, որ այն վերածվեց սկանդալի. «Բայց ես աջակցում եմ նրան, քանի որ երբ ամեն ինչ արդեն ասված և արված է, ոչ ոք արվեստագետին լռեցնելու իրավունք չունի: Ամենալավ ելքը՝ գտնել մի հայ հեղինակի, որը նման մի գիրք կգրի հայկական կողմի մասին: Կարծում եմ, որ նման համատեղ նախագիծը նույնիսկ Նոբելյան մրցանակ կբերի»:
Կարդացեք նաև
Էքրեմ Էյլիսլին ադրբեջանական հասարակության և իշխանության կողմից ճնշումների է ենթարկվում իր «Քարե երազներ» գրքի համար, որտեղ նկարագրություններ կան, թե ինչպես են ադրբեջանցիները կոտորել հայերին:
Պատրաստեց Հովհաննես ԻՇԽԱՆՅԱՆԸ
