Նոր «Ընտրական օրենսգրքից» դուրս է մնացել այն դրույթը, որով արգելվում է սոցիոլոգիական տվյալներ հրապարակել քվեարկությունից յոթ օր առաջ, թեեւ օրենսդրությունը շարունակում է նախատեսել պատասխանատվություն դրա համար: «Ընտրական օրենսգրքով» այժմ արգելված է նման տվյալներ հրապարակել միայն քվեարկության օրվա ընթացքում:
«Առավոտի» կամ որեւէ կայքի էլեկտրոնային հարցում բնավ սոցիոլոգիական չէ: Սակայն չցանկանալով խախտել այն կանոնները, ըստ որոնց՝ քվեարկության նախորդ օրն արգելվում է քարոզչությունը կամ հակաքարոզչությունը՝ մեր կայքից հեռացնում ենք այն հարցման տվյալները, թե ՀՀ նախագահի ո՞ր թեկնածուին են նախընտրում մեր ընթերցողները:
Խոստովանենք, որ մեր կայքի նոր դիզայնով ընդհանրապես նման հարցում նախատեսված չէր: Սակայն երբ հունվարի 21-ին գործարկվեց մեր նոր կայքը եւ այնտեղ այլեւս չկար հարցումը՝ ՀՀ նախագահի թեկնածու Վարդան Սեդրակյանը, որն այդ ժամանակ հարցման արդյունքներով առաջին տեղում էր՝ իր ասուլիսի մի հատվածը նվիրեց այդ փաստին, ենթադրություններ հրապարակելով, թե ինչու է այն հեռացվել:
Թե ով է այժմ առաջին տեղում ու ընդհանրապես նախասիրությունների ինչպիսի պատկեր է արձանագրվել՝ կարող եք դիտել հարցման վերջին պահի լուսապատճենում: Նշենք, որ հարցմանը մասնակցել էին 4432 օգտատերեր:
