Քանաքեռ-Զեյթունի ընդհանուր իրավասության դատարանում երեկ տեղի ունեցավ Սուրենյան պուրակի գործով դատական նիստը: Առանց հանրային լսումներ կազմակերպելու, առանց բնակիչներին տեղյակ պահելու կանաչապատ տարածքը ցանկապատվել է, և պատրաստվում են իրականացնել մեծածավալ շինարարություն: Բնակիչները հայց են ներկայացրել ընդդեմ «Մեծ Մահակ» ՍՊԸ-ի ՝ կասեցնելու շինարարական աշխատանքները: Պատասխանող կողմի ներկայացուցչի առարկությամբ՝ արգելվեց նկարահանումներ անցկացնել նիստի ժամանակ:
Պատասխանող կողմի ներկայացուցիչը միջնորդություն ներկայացրեց՝ համաձայն որի բնակիչները պարտավորվում են եռօրյա ժամկետում «Մեծ Մահակ» ՍՊԸ-ին փոխհատուցել 2մլն. 90 հազար ՀՀ դրամ՝ ընկերությանը հասցված վնասների համար: Եթե եռօրյա ժամկետում բնակիչները չվճարեն տույժը, պիտի այլևս չխոչընդոտեն շինարարական աշխատանքներին:
Դատարանը մերժեց պատասխանող կողմի միջնորդությունը՝ բավարար ապացույցներ չներկայացնելու պատճառով: Դատական նիստը հետաձգվեց մինչեւ մարտի 14-ը ժամը 10:30:
Ըստ հայցվոր Գ. Հայրապետյանի սա առաջին դեպքը չէ, որ ՀՀ քաղաքացիներին զրկում են առանց այն էլ սակավ կանաչապատ տարածքներից: «Մենք գործելու ենք: Այս հարցը դառնալու է հանրային հնչեղության հարց, նամակ ենք գրելու պարոն Մարգարյանին, Մաշտոցի պուրակի օրինակով նստացույցեր կկազմակերպենք, բայց մենք չենք թողնի, որ կպնեն մեր մի բուռ թթվածնին»:
Բնակիչների խոսքերով, եթե տարածքում իրականացնեն շինարարություն իրենք կզրկվեն նույնիսկ այդ փոքրիկ, բայց հարազատ հանգստի վայրից. «Ի վերջո, մենք գիտենք՝ ում օբյեկտն են կառուցելու մեր թթվածնի հաշվին»:
Մարինե ՂԱԶԱՐՅԱՆ
