ՀՀ կրթության և գիտության նախարար Արմեն Աշոտյանի նախաձեռնությամբ նախարարությունում տեղի է ունեցել հանդիպում բլոգերների և սոցիալական ցանցերի մի խումբ ակտիվ օգտատերերի հետ: Հանդիպման սկզբում նախարարը շնորհակալություն է հայտնել բլոգերներին՝ հրավերն ընդունելու համար և շեշտել, որ հանրային հատվածի հետ անմիջական համագործակցությունը կարևոր նպաստ է բերում կրթության ոլորտի կառավարման արդյունավետության բարձրացմանը:
Հանդիպման մասնակիցները նախարարին ներկայացրել են բազմաթիվ հարցեր, որոնք վերաբերել են ավագ դպրոցների գործունեությանը, բուհական ընդունելության ընթացակարգին և շտեմարաններին, դպրոցական դասագրքերին, ասպիրանատական տեղերի հատկացմանը, գիտական կոչումներին և աստիճանաշնորհմանը, ինչպես նաև միջազգային կրթական ծրագրերին, տարկետման իրավունքին և բազմաթիվ այլ խնդիրների: Նախարարը սպառիչ պատասխանել է բոլոր հարցերին, որոնց շուրջ ծավալվել է բուռն ու շահագրգիռ քննարկում: ՀՀ-ում սպասվող առաջիկա նախագահական ընտրությունների համատեքստում անդրադարձ է եղել նաև ՀՀ ԿԳ նախարարի կողմից կրթական մի քանի հաստատությունների ղեկավարների նկատմամբ կիրառված կարգապահական տույժերին, որոնց հետ կապված՝ բլոգերներն ու Ֆեյսբուքի օգտատերերը ներկայացրել են իրենց մոտեցումներն ու կարծիքները: Հանդիպման մասնակիցներն այս համատեքստում դրական են գնահատել նախարար Ա. Աշոտյանի հանրային գործունեությունը և քաղաքացիական ակտիվությունը, ինչը, ըստ մասնակիցների, նպաստում է նաև կրթական խնդիրների և ոլորտում բարձրացված հարցերի օպերատիվ լուծմանը: Հանդիպումն անցել է անկաշկանդ և ջերմ մթնոլորտում՝ ոչ պաշտոնական ձևաչափով:
“Ես շատ եմ սիրում քննադատություն. եթե քննադատական խոսքը բովանդակային խնդիր է պարունակում, դա ինձ համար հաճելի է, որն հետո վերածվում է ինտելեկտուալ պայքարի և գործունենության խթանի: Ուզում եմ խնդրել բոլորիդ, որ այսուհետ ևս ակտիվորեն հետևեք կրթության ոլորտին և ներկայացնենք ձեր դիտարկումները: Հավատացնում եմ, որ դրանք անհետևանք և անարձագանք չեն մնա “,- հանդիպման ավարտին դիմելով բլոգերներին՝ նշել է ՀՀ ԿԳ նախարարը:
ՀՀ կրթության և գիտության նախարարություն
