«Մեր սերունդը սովորել է մեծն նկարչից թե մարդկային վերաբերմունք, թե նկարչություն»,-այսօր Մկրտիչ Սեդրակյանի «Դիմանկարներ» խորագրով ցուցահանդեսի ժամանակ նշեց Հայաստանի Ազգային պատկերասրահի տնօրեն Փարավոն Միրզոյանը:
Նրա պնդմամբ Սեդրակյանը հրաշալի մարդ եւ վարպետ էր, ով կերպարվեստում ուներ իր հստակ դիրքը: Դիմանկարների շարքում վարպետը ցույց է տվել իր ժամանակների եւ մտերիմների այն կերպարները, որոնք իր համար հարազատ են եղել:
Մկրտիչ Սեդրակյանի ստեղծագործությունները ցուցադրվել են Մոսկվայում, Ս. Պետերբուրգում, Ալմա-Աթայում, Ֆրանսիայում, Գերմանիայում, Շվեդիայում, Շվեցարիայում, Թունիսում, Լիբիայում, ԱՄՆ-ում, Կանադայում:
Ունեցել է անհատական ցուցահանդեսներ Երեւանում, Էջմիածնում, Սան-Խոսեում, Սան-Ֆրանցիսկոյում, Լոս-Անջելեսում:
Արվեստագիտության դոկտոր-պրոֆեսոր Վիգեն Ղազարյանի խոսքով նկարչի ինքնանկարներում թերեւս ավելի ցայտուն են դրսեւորված ինչպես ներքին ապրումների խորությունը, այնպես էլ դասական ռեալիստ գեղանկարչի մեծ վարպետությունը: Դրան նպաստում է եւ այն, որ վարպետը միայն իր հետ է եւ ինքն իրենից ոչինչ չունի քողարկելու:
Նկարիչ Ֆերդինանտ Մանուկյանի համոզմամբ վարպետը հաստատել է իր տեղը հայ մշակույթի եւ կերպարվեստի բնագավառում:
Անժելա ՇԱՀՈՒՄՅԱՆ
