«Կրթական համակարգը ոչ միայն գիտելիքը փոխանցելու միջոց պետք է լինի, այլեւ գիտելիք ստեղծելու միջոց: Կրթությանը զուգահեռ գիտությունը պետք է զարգացնել»,-այսօր լրագրողների հետ հանդիպման ժամանակ նշեց Մովսես Խորենացու անվան համալսարանի ռեկտոր Արթուր Աղաբաբյանը:
Նրա պնդմամբ կրթության ու գիտության ոլորտի բարեփոխումները գործող նախագահի նախընտրական ծրագրում է երեւում: Կրթության համակարգի վրա ռազմավարական ուշադրություն պետք է դարձնել.
«Կարելի է խոսել ծրագրերի մասին, սակայն անդրադառնալով նախորդ տարիներին կատարած քայլերին` տեսական եւ գործնական: Առաջադրված նախագահի թեկնածուներից մի քանիսի ծրագրերին անգամ չեմ էլ ծանոթացել, կան տեսական ծրագրեր, որոնք իրականացման ինչ հեռանկարներ կունենան դա անհայտ է: Չեմ ուզում սեւ փիառի տարբերակին դիմել, սակայն ունեցել ենք փորձ, կան գործնական վերլուծություններ»:
Ռեկտորի համոզմամբ նախագահի նախընտրական ծրագրերում տեղ են գտել մանկական հաստատությունների ստեղծումը, նոր տեխնոլոգիաների ներմուծումը: Ուշադրություն է դարձվում սոցիալապես անապահով ուսանողների վարձը նվազեցնելու համար, ինչը շատ է կարեւորվում:
«Բուհում եթե ատեստատ չկա, ընդունելության քննության մասին չենք էլ կարող մտածել: Այսօր նախագահի թեկնածուներ կան, որոնք «ատեստատ» չունենալով ցանկանում են «բուհ» ընդունվել»:
Անժելա ՇԱՀՈՒՄՅԱՆ
