Քարոզարշավը դեռ չավարտված՝ նախագահի թեկնածուների շտաբների ներկայացուցիչներն արդեն դիմել են քաղաքապետարան՝ հետընտրական միջոցառումների համար խորհրդանշական հարթակները զբաղեցնելու դիմումներով: Մեր երկրում ընտրական զարգացումներն այնքան կանխատեսելի են, որ թեկնածուները նախապես կարող են մշակել նաեւ հետընտրական միջոցառումների սցենարներ:Սակայն եթե նախորդ ընտրության ժամանակ այդ խորհրդանշական հարթակները շտապում էր զբաղեցնել արմատական ընդդիմությունը՝ իշխանության դեմ անողոք պայքար մղելու նպատակով, ապա այս անգամ Ազատության հրապարակն ու Մատենադարանի հարակից տարածքը որոշել է իրենով անել ոչ արմատական ընդդիմություն համարվող «Ժառանգություն» կուսակցությունը: Փոխնախագահ Արմեն Մարտիրոսյանն արդեն դիմել է քաղաքապետարան եւ իրազեկել փետրվարի 20-ին, 21-ին, 22-ին հանրահավաքներ անցկացնելու մտադրության մասին: 20-ին եւ 22-ին՝ Ազատության հրապարակում, 21-ին՝ Մատենադարանում:
Սա էլ այն պատճառով, որ այդ օրը Ազատության հրապարակում միջոցառում է անելու իշխող կուսակցությունը: Թերեւս վերջինը պատրաստվում է իր սազանդար երգիչ-երգչուհիների հետ նշել «հաղթանակը»: Արմատական ընդդիմություն համարվող Հրանտ Բագրատյանը դեռ չի պլանավորել հետընտրական անելիքը: Դրան կանդրադառնա, երբ ակնհայտ կլինի ընտրությունների արդյունքների թվաբանության ճշգրիտ պատկերը: Իսկ ի՞նչ նպատակով է ընտրություններից անմիջապես հետո «Ժառանգությունն» իրար հաջորդող երեք օր որոշել զբաղեցնել միտինգային հարթակները, արդյո՞ք հետընտրական ընդվզման են պատրաստվում, թե՞ հակառակը՝ հաղթական հանդեսի: Արմեն Մարտիրոսյանը մեզ հետ զրույցում ասաց, որ դեռ հայտնի չէ կոնկրետ նպատակը: «Ոչ մի բանի էլ հլը չենք պատրաստվում եւ ամեն ինչի ենք պատրաստվում: Այսինքն, մենք միշտ պատրաստ վիճակում ենք եւ ցանկացած պարագայում ցանկանում ենք, որ ամեն ինչ նորմալ ընթանա»,-մեկնաբանեց նա:
Նախապես ապահովագրելու մտադրությունն իհարկե, մեր իշխանության ձեռագրի դեպքում, լիովին արդարացված է: Չմոռանանք, որ իշխանությունը, նման դեպքերում ինչ-որ միջոցառումներ կազմակերպելով, փորձում է նմանատիպ վայրերը զբաղեցնել, որպեսզի միտինգային տրամադրությունների դեպքում ընդդիմությունը հարթակ չունենա: Իշխանության ճղճիմ քայլերից զերծ մնալու համար մարդիկ նախապես են մտածել եւ օրենքի շրջանակում զբաղեցրել հայտնի ամբիոնները: Մանավանդ, եթե դիտարկենք նախընտրական քարոզարշավը, կնկատենք, որ քարոզարշավի մեկնարկին Սերժ Սարգսյանի թիմը շատ ավելի հանգիստ էր ու ինքնավստահ: Ընթացքում Րաֆֆի Հովհաննիսյանի եւ Հրանտ Բագրատյանի «ակցիաները» սկսեցին բարձրանալ, եւ նկատվեց ընտրողների ակտիվացում: Մինչդեռ ՀՀԿ թիմում տիրող հանգստությունը բավականին թուլացրեց Սերժ Սարգսյանի դիրքերը: Դրան նպաստեցին նաեւ վերջինիս հրապարակային «կիքսերը»: Եվ արդեն վերջին օրերին նշմարվում է, որ իշխանության օլիմպիական հանգստությունը փոխարինվել է պարտության անհանգստությամբ: Խուճապային տրամադրություններն իշխանական թիմում անզեն աչքով նկատելի են: Այնպես որ, հետընտրական սրացումները եւս սարերի ետեւում չեն:
Կարդացեք նաև
Գայանե Սարիբեկյան
«Հրապարակ»
