Հիշեցնում ենք, որ սույն թվականի փետրվարի 1-ին «Բանակն իրականում» քաղաքացիական նախաձեռնության կողմից հայկական բանակի խնդիրների լուծմանն ուղղված հարցաշար էր ուղարկվել ՀՀ նախագահի բոլոր ութ թեկնածուներին: Ընտրություններից երեք օր առաջ, ամփոփելով արդյունքները,հայտարարում ենք, որ մեր հարցմանն արձագանքել են թեկնածուներից միայն երկուսը` Հրանտ Բագրատյանն ու Րաֆֆի Հովհաննիսյանը:
Հարկ ենք համարում նշել նաև, որ Հ. Բագրատյանը պատասխանել է մեր հարցաշարի բոլոր հարցերին և պահպանել է նախանշված ֆորմատը, իսկ Ր. Հովհաննիսյանն ուղարկել է իր նախընտրական ծրագրի համապատասխան հատվածներն ու հղում է կատարել քարոզչական նյութերին: Երկու թեկնածուներիպատասխաններն էլ ներկայացված են կից և հրապարակվում են այնպես, ինչպես ուղարկվել են, առանց փոփոխության:
«Բանակն իրականում» քաղաքացիական նախաձեռնությունն ափսոսանք է հայտնում այն կապակցությամբ, որ ՀՀ նախագահի և գերագույն գլխավոր հրամանատարի պաշտոնին հավակնող մյուս վեց թեկնածուները անտեսել են հարցումը և կարևոր չեն համարել հայկական բանակի առջև ծառացած խնդիրներիլուծման իրենց տեսլականը ներկայացնել հանրությանը:
«Բանակն իրականում» քաղաքացիական նախաձեռնություն
