2012 թվականի հունվարից շուրջ 120 հազար պետական ապարատի աշխատակիցների եւ նրանց անմիջական ընտանիքի անդամներին մի խումբ սոցիալական ծառայություններից օգտվելու հնարավորություն ընձեռվեց: Սոցիալական ծառայությունները ընդգրկում էին առողջության ապահովագրությունը, հիփոթեքային վարկի ամսական վճարի մարումը, ԿԳՆ կողմից հաստատված ուսումնական ծրագրերով ուսման վճարումը եւ հանգստի կազմակերպումը ՀՀ եւ ԼՂՀ տարածքներում:
Այսօր լրագրողների հետ հանդիպման ժամանակ Ֆինանսների նախարար Վաչե Գաբրիելյանը հայտարարեց, որ կառավարության որոշմամբ` այս տարվանից ծրագրի շահառուների շրջանակը ընդլայնվել է շուրջ 30 հազարով:
«Տեղի է ունեցել շահառուների ավելացում: Երբ որ մենք 2012 թվականի համար նախաձեռնեցինք սոցիալական փաթեթը, հիմնականում այն միտված էր քաղծառայողներին, պետական ապարատի միջուկին եւ նրանց հավասարեցված անձանց: Մենք այն ժամանակ ընդգրկեցինք հիմնական միջուկին՝ չընդգրկելով վերեւում եւ ներքեւում գտնվող անձանց: Վերեւում գտնվող անձինք՝ համապատասխան օրենսդրությամբ պաշտոնատար անձինք են համարվում, ներքեւում գտնվող անձինք, որոնք հիմնականում տեխնիկական բնույթի աշխատանքներ են կատարում նախարարություններում, նրանք եւս ընդգրկվել են սոցփաթեթի մեջ»,- ասաց Ֆինանսների նախարարը՝ հավելելով, որ սոցիալական փաթեթից նաեւ կարող են օգտվել Գիտությունների ազգային ակադեմիայի աշխատակազմի եւ նրան ՊՈԱԿ-ների հաստիքացուցակներում ընդգրկված աշխատակիցները եւ ՀՀ-ում մշտապես բնակվող ԽՍՀՄ եւ «Ժողովրդական» պատվավոր կոչմանն արժանացած անձինք, ինչպես նաեւ Կ. Դեմիրճյանի անվան Երեւանի մետրոպոլիտենի աշխատակիցները՝ բացառությամբ ղեկավար աշխատակազմի:
«Եթե քաղծառայողը առաջ այդ գումարը տարվա ընթացքում, ամբողջովին չէր ծախսում, ապա այդ գումարը նորից հետ էր վերադարձվում պետբյուջե, հիմա մենք այդ գումարը փոխանցելու ենք նրա հաշվին: Այդ գումարի օգտագործումը լինելու է փաթեթի կողմից նախանշված չորս ուղություններով: Ընդհանուր պայմանագրեր ունենք բանկերի հետ, այս պահին պայմանագրեր ենք կնքել 11 բանկերի հետ»,- նշեց նախարարը` ընգծելով, որ շահառուները արդեն հնարավորություն կունենան կուտակել գումարները եւ դրանց համար տոկոսներ ստանալ:
Կարդացեք նաև
Ի դեպ, սոցիալական փաթեթով նախատեսված գումարը յուրաքանչյուր աշխատակցի համար կազմում է 11 հազար դրամ, որը տարեկան կտրվածքով հավասար է 132 հազար դրամին, իսկ առողջության ապահովագրության ծառայության համար սահմանված է 52 հազար դրամի չափով բազային ծածկույթ:
Ընդլայնվել է նաեւ բազային փաթեթի մեջ ներառված հատուցվող դեպքերի շրջանակը` սրտի ավելի ծավալուն վիրահատությունների փոխհատուցումը, ուռուցքաբանության ժամանակ կիրառվող վիրահատական բուժումը եւ սահմանափակ քանակությամբ ճառագայթային բուժումը:
Աշոտ ԱԹԱՅԱՆ
