Հայաստանի կանաչների կուսակցության նախագահ Արմենակ Դովլաթյանը սատարում է այս ընտրություններում Հրանտ Բագրատյանին: Այսօր «Նոյյան տապան» ակումբում Aravot.am-ը հետաքրքրվեց, թե ինչպես է պարոն Դովլաթյանը գնահատում նրա քարոզարշավը, արդյոք նա այնքան բա՞րդ է խոսում, որ մարդիկ չեն հասկանում, «դիսերտացիա» է պաշտպանում, ինչպես ասում են քաղտեխնոլոգները: Նա պատասխանեց. «Հրանտ Բագրատյանը երբ խոսում է, շատերի համար բարդ է թվում, որովհետեւ նա խոսում է չէի ասի գիտական, այլ՝ ծրագրային ֆիքսված մոտեցումներով: Բնակչության մի մասին դա չի հետաքրքրում: Մի մասին հետաքրքրում է, որ իրենց ժպտում, բարեւում են, մի մասին հետաքրքրում է փողը, բայց մի բան հաստատ է, այս ընթացքում Հրանտ Բագրատյանի ռեյտինգը բավականին մեծացել է: Դա հաստատ է: Ինչու ենք մենք սատարում Հրանտ Բագրատյանին, որովհետեւ ծրագրային բաներ կան, որոնք մեր առաջարկից են եղել, Հրանտ Բագրատյանի ծրագիրը հստակ է, որ մարդկանց ոչ թե գլորի փոսը, այլ հանի փոսից: Հստակ է, թե ինչպես կարելի է օր օրի, ժամ ժամի պետության վիճակը լավացնել»:
Մեր հարցին՝ Հրանտ Բագրատյանն ունի՞ բավականաչափ մարդիկ՝ ընտրությունների ընթացքը վերահսկելու համար՝ պարոն Դովլաթյանն ասաց, որ ՀԱԿ-ը ունի տեղամասային ընտրական հանձնաժողովներում տեղեր, բայց բոլոր 1988-ը ՀԱԿ-ը չի ծածկում, ուստի այդ տեղերը կզբաղեցնեն իշխանական թեւից:
Թեեւ Րաֆի Հովհաննիսյանն իր ֆեյսբուքյան էջում գրել է, որ «Ժառանգությանը» հաջողվել է հանձնաժողովներում ծածկել իր տեղերը, սակայն պարոն Դովլաթյանը վստահ է, որ «Ժառանգությունը» չունի լիցենզավորված այդքան անձանց»: Մեր հարցին՝ այսինքն, այդ տեղերը ծախում են ՀՀԿ-ի՞ն՝ նա պատասխանեց. «Չէի ասի ծախում են, բայց երբ չի լրացվում, դա լրացվում է իշխանության կողմից»:
Հռիփսիմե ՋԵԲԵՋՅԱՆ
