Այսօր «Նոյյան տապան» ակումբում ՀԱԿ անդամ Հայաստանի կանաչների կուսակցության նախագահ,Արմենակ Դովլաթյանը զգուշացրեց, թե ինչպիսի խախտումներ են լինելու այս ընտրություններում. «Մայիսին մասնակցել եմ ընտրություններին: Գիտեմ, թե ինչպես էին քվեարկում եւ ինչու կոպիտ, ուժային միջոցներ չեն կիրառվում ՝վերջին ընտրությունների ժամանակ: Նույնը կատարվելու է նաեւ հիմա: Իշխանություններն ունեն բոլոր բացակայողների տվյալները, որ շենքում ինչ մարդիկ կան: Նրանց ձայները իշխանության թեկնածուի օգտին են գնում»:
Նա պատմեց, որ դեպք գիտի, մարդը միամիտ բնակարանի հետ կապված գործարք է արել ու պարզել, որ իր տան վրա 4 անծանոթ մարդ կա գրանցված: Այդպես հազարավոր դեպքեր կարող են լինել ու ապահովել ձայներ. «Մարդկանց ուղարկում են ընտրությունների, ընտրատեղամասի առաջ նստած են լինում ՀՀԿ-ականներ՝ իրենց ցուցակներով եւ տալիս են իրենց կողմից ուղղորդված ընտրողին թերթիկներ՝ վրան գրված ինչ-որ անուն-ազգանուն, ում փոխարեն պետք է քվեարկի: Այդ թերթիկով երբ մարդը մտնում է, հանձնաժողովի անդամն արդեն գիտի, որ դա իրենց մարդն է եւ շատ հանգիստ տալիս է քվեաթերթիկը: Այս միջոցով էլ իշխանությունները անաղմուկ ձայներ են հավաքում՝ իրենց օգտին: Եթե նկատում էլ են, այդ մարդը արագ դուրս է գալիս տեղամասից, ասում է՝ վաաայ, կներեք, շփոթվեցի:
Անդրադառնալով նախագահի թեկնածուներին, մենք խնդրեցինք պարոն Դովլաթյանին ասել, թե ո՞ւմ է համարում ընդդիմության եւ ում՝ իշխանության ներկայացուցիչ՝ թեկնածուներից: Նրա խոսքերով՝ ընդդիմություն է բնականաբար Հրանտ Բագրատյանը եւ Րաֆֆի Հովհաննիսյանը. «Անդրիաս Ղուկասյանին օգտագործում են դաժանաբար: Պարույր Հայրիկյանն ինքն իր համար ստեղծեց պրոբլեմներ: Նա ինքն իրեն փակուղի մտցրեց՝ իր գործողություններով: Արամ Հարությունյանը մշտական ունի, Արման Մելիքանը շատ պատրաստված, հետաքրքիր անձնավորություն է, բայց որպես նախագահի թեկնածու ինքը իմ կողմից չի դիտվում, իսկ էպոսագետը էպոսային հայտարարություններ է անում՝ սկսած տիեզերքից, մասոններից վերջացրած»:
Հռիփսիմե ՋԵԲԵՋՅԱՆ
Կարդացեք նաև
