Ամբողջ աշխարհում տարեկան 200 հազար երեխա հիվանդանում է քաղցկեղով: Ամեն օր 250 երեխա մահանում է քաղցկեղից:
Փետրվարի 15-ը մանկական քաղցկեղի դեմ պայքարի համաշխարհային օրն է: Հայաստանում տարեկան գրանցվում է 80-90 մանկական քաղցկեղի դեպք: Ուռուցքաբանության ազգային կենտրոնի մանկական ուռուցքաբանության բաժանմունքի ղեկավար Գրիգոր Բադալյանի հավաստմամբ` Հայաստանում քաղցկեղից լիովին բուժված երեխաները ամբողջ հիվանդների 65%-ն են կազմում:
Ի տարբերություն մեծահասակների` մանուկների մոտ քաղցկեղի առաջացման պատճառները մեծամասամբ անհայտ են:
«Ամենահաճախ հանդիպվողն արյան քաղցկեղն է` լեյկեմիան, որը չարորակ ուռուցքների մոտ մեկ քառորդն է կազմում, երկրորդ ամենահաճախ հանդիպվող տեսակը ավշային համակարգի ախտահարումներն են, երրորդ տեղում` ինչքան էլ զարմանալի հնչի, գլխուղեղի կենտրոնական նյարդային համակարգի ուռուցքներն են»,- այսօր «Նոյյան Տապան» լրատվական սրահում, խոսելով մանկական քաղցկեղի հիվանդացության դեպքերի մասին, նշեց մանկական ուռուցքաբանության բաժանմունքի ղեկավարը:
Կարդացեք նաև
Ըստ մասնագետի` մանուկների մոտ քաղցկեղով հիվանդանալը մեծապես կարող է կախված լինել մանկան մոր ապրելակերպի հետ: Նրա խոսքով.«Հղի կինը պիտի չծխի, ալկոհոլ չօգատործի, պիտի խուսափի ճառագայթումից»:
Գ. Բադալյանի խոսքով` մանուկների մոտ քաղցկեղը ավելի հեշտ է բուժել, քան մեծահասակների մոտ, քանի որ մանուկների մոտ ավելի արդյունավետ է կատարվում քիմիաթերապիան:
Aravot.am-ի այն հարցին, թե արդյոք ներկայում կա՞ն խնդիրներ արտասահմանից ներմուծվող եւ Հայաստանում դեռեւս չգրանցված թանկարժեք դեղերի ներմուծման հարցում, ուռուցքաբանը պատասխանեց.
«Այդ խնդիրները կան: Շատ անգամ կարիք կա այն դեղերի, որոնք Հայաստանում չկան»:
Իսկ Ուռուցքաբանության ազգային կենտրոնի փոխտնօրեն Արմեն Տատանյանն ավելացրեց.
«Վերջին մեկ տարվա ընթացքում այս դաշտն արդեն կանոնակարգվել է: Գրեթե բոլոր դեղագործական ընկերությունները արդեն գրանցել են այդ թանկարժեք դեղերը: Հարցը նրանում է, թե արդյոք այդ դեղերը հիվանդի հարազատները կկարողանա՞ն ձեռք բերել: Այդ դեղերի մեջ կան այնպիսիները, որոնք, ցավոք, ոչ բոլորն են կարող ձեռք բերել: Այդ թանկարժեք դեղորայքը մենք ստանում ենք նաեւ հումանիտար ճանապարհով: Տարբեր կազմակերպություններ` գուցե քիչ քանակով, տրամադրում են այդ դեղորայքը»:
Բանախոսների կարծիքով` իրենց կենտրոնի` տարեկան 200 հիվանդ ունենալը ոչ թե վկայում է, որ հիվանդացության աճ կա, այլ` որ ավելի արդյունավետ է դարձել բուժումը:
Աշոտ ԱԹԱՅԱՆ
