Րաֆֆի Հովհաննիսյանն իր քարոզարշավի ընթացքում բնականաբար քննադատում է այս իշխանությանը, խոսում է արտագաղթի, երկրում ստեղծված ծանր իրավիճակի մասին, բայց կարմիր գծի նման տանում է նաեւ այն թելը, որ Սերժ Սարգսյանը մեծ ավանդ ունի Արցախյան գոյամարտում, երեկ էլ ասաց, որ նա բարի մարդ է, մարդկանց էլ ասում է, որ գնացեք ընտրության, ում ուզում եք ընտրեք, թեկուզ՝ Սերժին:
Այսօր Aravot.am-ը «Ուրբաթ» ակումբում հետաքրքրվեց «Ժառանգություն» խմբակցության ղեկավար Ռուբեն Հակոբյանից, թե ինչո՞ւ է Րաֆֆի Հովհաննիսյանը գովում Սերժ Սարգսյանին՝ լինելով նրա մրցակիցը: Նա պատասխանեց. «Մեր մշակույթը հետեւյալն է, որ անպայման կամ պիտի լավը ասես, կամ՝ վատը, որը շատ արհեստական է: Իր դաստիարակությունը ասում է, իսկապես ես էլ կարծում եմ, որ չպետք է ուրանալ, որ Սերժ Սարգսյանը մեծ ավանդ ունի պատերազմում»:
Մեր դիտարկմանը, որ այդպես Սերժ Սարգսյանի դրական կերպարն է կերտվում ընտրողների մոտ՝ Ռուբեն Հակոբյանը պատասխանեց. «Կապ չունի: Րաֆֆի Հովհաննիսյանն այն կերպարն է, որ ճշմարտությունը, եթե կարող է ի վնաս իրեն գալ, ինքը կասի այդ ճշմարտությունը: Ես չեմ ասում՝ դա լավ է, թե վատ: Ես ասում եմ, որ դա փաստի արձանագրումն է: Ասել միայն վատը՝ դա ազնիվ չէ: Ազնիվ չէ նաեւ չասել, որ ունենք մենաշնորհներ, ստվերային տնտեսություն, արտագաղթ»:
Հռիփսիմե ՋԵԲԵՋՅԱՆ
