Նախօրեին մամուլում տեղեկություն եղավ, որ Արարատի մարզի մի քանի ընտրական տեղամասերի հանձնաժողովների կազմից ՀԱԿ-ը հանել է դաշինքի ներկայացուցիչներին՝ իր մանդատները շնորհելով ՀՀԿ-ականների եւ ԲՀԿ-ականների։ Տեղեկատվության աղբյուրը վերջերս Հրանտ Բազրատյանի Արտաշատի շտաբը համակարգելու համար ՀՀՇ շարքերից հեռացված Հենրիկ Ավագյանն է։ Նա մեզ հայտնեց, որ լուրը համապատասխանում է իրականությանը։ «Հանձնաժողովներում ՀԱԿ-ի տեղերը մեր՝ Կոնգրեսի լիցենզավորված մարդկանց թողելով դուրս, տվեցին Հանրապետական ու Բարգավաճ, նշանակելով նրանց»,- ասաց նախկին ՀՀՇ-ականը։
Հարցին՝ ՀԱ՞Կ-ն է նշանակել այլ կուսակցությունների այդ մարդկանց, թե տեղերը ազատ են մնացել եւ համալրվել են ինչ-որ սկզբունքով, Ավագյանը պատասխանեց. «Ո՞նց ազատ կմնան, մեր ՀԱԿ-ի տեղերը մենք չենք կարում փակենք»։
Հարցին՝ համոզվա՞ծ եք, որ էդ նշանակված մարդիկ ՀՀԿ-ական են կամ ԲՀԿ-ից, պնդեց, որ բոլորին ճանաչում է, ցուցակն իր մոտ է։ Ավելին, ասաց հետեւյալը. «Մեր տղաներին էլ, որ նշանակված էին, հանել են։ Նշանակել էին իրանց, հետո հանեցին։ Թե ինչի էին հանել, տեղյակ չեմ այս պահին»։
Մեր զրուցակցի խոսքով, Կոնգրեսականներին ցուցակից հանողն ու իշխանության ներկայացուցիչներին նշանակողը եղել է ՀԱԿ-ի Արտաշատի պատասխանատու Հարութ Հովհաննիսյանը։ Վերջինս հանձնաժողովների ցուցակներից հանված անձանց ասել է. «իմ ձեռն ա, ոնց ուզեմ, էդպես կանեմ»։ Մեր հեռախոսազրույցի պահին Հենրիկ Ավագյանի մոտ էին ՀԱԿ-ի լիցենզավորված եւ հետո ցուցակներից հանված անձանցից 4-ը։ Զրուցեցինք նրանցից Արուսյակ Հովհաննիսյանի հետ։ Նա ասաց հետեւյալը. «Որքան հասկանում եմ, ՀԱԿ-ի ներկայացուցիչներից, որը կարող է պայքար տանել, չպիտի ընդգրկվի էդ ցուցակների մեջ, ինչքան հեռու լինի ընտրություններից, այնքան իրենց ձեռ ա տալիս»։
Կարդացեք նաև
Տիկին Հովհաննիսյանը նույնպես հաստատեց, որ Հարութ Հովհաննիսյանն է հանել իր անունը հանձնաժողովի կազմից՝ ասելով, թե՝ ինձ ով ձեռ ա տալիս, նրան էլ նշանակում եմ։ Իմ զրուցակիցը հանձնաժողովներից հեռացվածներից նշեց նաեւ Քաջիկ Գրիգորյանի անունը։
Արուսյակ Հովհաննիսյանի ասելով՝ «Հարութը եւ նրա օգնական Վիկտորը իրենց հարազատներով են՝ քենիով, քրոջով, եղբորով, եւ կառավարում են ոնց ուզում են։ Էս ընտրությունները տենց արեցին, նախորդ ընտրությունը՝ նույնպես։ Շատ բաներ կարելի ա պատմել, ուղղակի հեռախոսով երեւի հարմար չի»,- ասաց տիկինը։
Ստեղծված իրավիճակի վերաբերյալ պարզաբանում ստանալու նպատակով փորձեցինք կապվել Կոնգրեսի համակարգողի եւ խմբակցության քարտուղարի հետ, սակայն վերջիններս մեր հեռախոսազանգերին չպատասխանեցին։
«Հայկական ժամանակ»
