Ադրբեջանցի գրող Աքրամ Այլիսլիի շուրջ ծագածսկանդալը գնալով թափ է հավաքում: Չորեքշաբթի օրը նրա «Քարե երազներ» գիրքը դատապարտող հայտարարությամբ հանդես եկավ ադրբեջանցիների հոգեւոր առաջնորդը` Կովկասի մահմեդականների վարչության ղեկավար Ալլահշուքյուր Փաշազադեն:
Ուշագրավ է, որ շեյխ-ուլ-իսլամին նախեւառաջ դուր չէր եկել Այլիսլիի գրքում Հեյդար Ալիեւի հասցեին հնչեցված քննադատությունը:
«Գրքի հեղինակը մտածված կերպով, իր տերերի պատվերով անարգել է Հեյդար Ալիեւի հիշատակը: Նա անարգել է իսլամը, ոտնահարել ադրբեջանցի ժողովրդի հոգեւոր ու ազգային արժեքները: Կարող եմ ասել, որ Այլիսլին հերետիկոս է եւ անաստված», – հայտարարեց Փաշազադեն:
Կովկասի մահմեդականների վարչության ղեկավարի այս հայտարարությունը հնչեց Այլիսլիի գրքին նվիրված հատուկ քննարկման ժամանակ: Դրա մասնակիցների ճնշող մեծամասնությունը, ըստ «Թուրան» գործակալության, ազնվորեն խոստովանում էր, որ «Քարե երազներ» վեպը չի ընթերցել: Դա, սակայն, քննարկման մասնակիցներին չխանգարեց խստորեն դատապարտել ադրբեջանցի արձակագրին:
Կարդացեք նաև
Ադրբեջանի գիտությունների ակադեմիայի պատմության ինստիտուտի տնօրենը, օրինակ, պնդում էր, թե Այլիսլին իր ստեղծագործությամբ փորձում է արդարացնել հայկական կողմից Նախիջեւանին ներկայացվող տարածքային պահանջները:
Ադրբեջանցի մտավորականության` արտերկրում հայտնի ներկայացուցիչները, սակայն, չեն շտապում քննադատել Այլիսլիին:
Հայտնի գրող եւ կինոռեժիսոր Ռուստամ Իբրահիմբեկովը երեկ հանդես եկավ հայտարարությամբ` նշելով. – «Այլիսլին առաջինը չէ, որ ենթարկվում է համատարած բարոյական ահաբեկման այն քաղաքականությանը, որ կիրառվում է Ադրբեջանում: Ոմանց վերացնում են հանցագործների ձեռքով, ոմանց թունավորում են, ոմանց էլ` ով տարեց է ու տպավորվող, ավելի հեշտ է պարզապես հասցնել սրտի կաթվածի»:
«Այլիսլիի դեմ մեկնարկած քարոզչական արշավը թափ է հավաքում` Ադբեջանը հավասարեցնելով աշխարհի ամենատգետ բռնապետությունների մակարդակին», – նշում է Իբրահիմբեկովը:
Գեւորգ Ստամբոլցյան
«Ազատություն» ռադիոկայան
