Էքստրասենսը թեկնածուից քարոզարշավի ժամանակ տուն է ուզում
Այսօր Արմավիրի մարզում նախագահի թեկնածու Րաֆֆի Հովհաննիսյանը Առատաշեն գյուղում մոտեցավ բլոտի սեղանի շուրջ հավաքված պապիկների: Նրանցից հետաքրքրվեց, թե ինչի՞ մասին են զրուցում: «Ամեն ինչից էլ, քաղաքականության մասին էլ: Ամեն ինչի մասին էլ գիտենք: Գիտենք, որ Պարույր Հայրիկյանը դավաճան է»,- միանգամից իրենց իմացած տեղեկատվությունն ասացին գյուղացիները: Րաֆֆի Հովհաննիսյանը հորդորեց ուրիշ՝ ավելի լավ բաներից խոսել: Առատաշենցիներից մեկի՝ Պարույրի խոսքերով՝ «հույսներս դրել ենք քո վրա, տենանք, մի բան անելո՞ւ ես, թե՞ չէ: Ձայներիդ տեր պիտի կանգնես, հա՛»:
Րաֆֆի Հովհաննիսյանը խոստացավ՝ «Ես ձեր ձայների, դուք՝ իմ ձայնի տեր, համաձա՞յն եք»: Նա գյուղացու՝ Պարույրի հետ ձեռք սեղմեց ու պայմանագիր կապեց. «Այս մեկ ամսում մենք հաղթահարել ենք մեր վախը եւ 5 օր անց պիտի քվե տանք ու պահենք»:
Առատաշենցիները նշում էին, որ Րաֆֆի Հովհաննիսյանն իրենց գյուղում «կրելու» է:
Կարդացեք նաև
Թեկնածուն այցելեց նաեւ Արշալույս գյուղի բժշկական ամբուլատորիա, խոսեց բժիշկների հետ, մաղթեց առողջություն, հետաքրքրվեց հիվանդներից:
Էջմիածնի շուկա մտնելուն պես՝ հատկապես պանրավաճառները սկսեցին ծափահարել Րաֆֆի Հովհաննիսյանին: Վաճառականներից մեկը՝ Ռիմա Պետրոսյանը, հեռվից հեռու բղավեց. «Մենք ձեզ պետք ա ընտրենք՝ առանց վախենալու: Ոչ մեկը ինձ չի կարող ճնշել, եթե ես ունեմ նորմալ գաղափար»:
Մեր հարցին՝ գեներալ Մանվելը չի՞ ճնշի, եթե իմանա, որ Էջմիածնում ընտրում են ոչ թե Սերժ Սարգսյանին, այլ՝ Րաֆֆի Հովհաննիսյանին, կինը պատասխանեց. «Ոչ մի անգամ: Ես նրան էլ եմ հարգում, նա ինձ երբեք չի ճնշել: Ազատ ասում է՝ ում ուզում եք ընտրեք: Ես կարող եմ ցանկացածի ընտրել: Դա իմ իրավունքն է»:
Րաֆֆի Հովհաննիսյանը նաեւ մտավ հագուստի շուկա, օգնեց ընտրություն կատարել գնորդներից մեկին՝ շուռումուռ տալով նրա հավանած զգեստը:
Փողոցում մոտենալով սխտոր վաճառող մի կնոջ էլ՝ նախագահի թեկնածուն կնոջ բողոքին, որ «ապրելու ճար չունեմ, դե արի սենց ապրի»՝ հույս տվեց. «Պիտի պայքարենք, ճարը կգտնենք»: Էջմիածինցին չհամաձայնեց. «Էէէ՜, 70 տարի պայքարել եմ, էլ ո՞նց պայքարեմ: Թեկնածուն վստահեցրեց, որ «եթե անգամ ելք չկա, խենթերը գտնում են հնար»:
Էջմիածնում Րաֆֆի Հովհաննիսյանին մոտեցավ նաեւ մի էքստրասենս՝ Լուսիկ Օհանջանյանն ու բողոքեց. «Էքստրասենս եմ, ինձ մինչեւ հմի բանատեղ չեն դրել: Ինձ տանջել են, մնացել եմ փողոցում»: Րաֆֆի Հովհանիսյանը խոստացավ՝ «պիտի փոխենք: Փողոցում ոչ մեկը չպիտի մնա: Մինչեւ ընտրություն ձեր հարցերին չեմ կարող պատասխանել: «Օրրանը» կարող է օգտակար լինել»:
Էքստրասենսից հետաքրքրվեցինք, թե ինչպիսի՞ էներգիա ունի նախագահի թեկնածուն: Կինն ասաց, որ ինքը ձեռքը դնում է հիվանդների վրա եւ ախտորոշում, բայց ընդհանուր առմամբ կարող է ասել, որ Րաֆֆի Հովհաննիսյանը լավ էներգիա ունի:
Հռիփսիմե ՋԵԲԵՋՅԱՆ
