Համատեղ ճաշկերույթն ավարտվել էր սպանությամբ
Իջեւանում, Տավուշի մարզի առաջին ատյանի դատարանում ընթանում է Իջեւան քաղաքի բնակիչ,1981 թ. ծնված Հունան Թամամյանի դատավարությունը:
Նա մեղադրվում է այն բանի համար, որ 2012թ . հունիսի 28-ին, Իջեւան քաղաքի «Մարմար» ռեստորանում լինելով ալկոհոլային հարբածության վիճակում, վիճաբանել է Իջեւանի բնակիչ, 30-ամյա Խորեն Հովհաննիսյանի հետ, դանակով հարվածել վերջինիս կրծքավանդակի ձախ մասին, որի հետեւանքով Խ. Հովհաննիսյանը Իջեւանի բժշկական կենտրոն տանելու ճանապարհին մահացել է:
Կարդացեք նաև
Հ. Թամամյանին մեղադրանք է առաջադրվել ՀՀ քրեական օրենսգրքի 104 հոդվածի 1-ին մասով («Սպանություն») եւ 268 հոդվածի 1-ին մասով («Թմրամիջոցների կամ հոգեմետ (հոգեներգործուն) նյութերի ապօրինի շրջանառությունն առանց իրացնելու նպատակի»): Ամբաստանյալի նկատմամբ խափանման միջոց է ընտրվել կալանավորումը:
Դատավարության հերթական՝ փետրվարի 12-ի նիստը կայացավ լեփլեցուն դահլիճում, դատական կարգադրիչները դատական նիստերի այլ դահլիճներից 2 նստարան բերեցին: Այդ նիստում վկայություն տվեցին գործով երկու վկաներ: Դատավոր Ռաֆիկ Մելքոնյանն ասաց, որ նրանք դատարան են եկել բերման երկու որոշումներից հետո: Որպես վկա հանդես եկած, «Մարմար» ռեստորանի 39-ամյա մատուցողուհի Աննա Չիբուխչյանը պատմեց, որ այդ օրը երեկոյան Խորենն իր երկու ընկերների հետ ռեստորան էր եկել, հետո նրանց են միացել այլ անձինք, նաեւ՝ Հունան Թամամյանը: Մատուցողուհու խոսքերով՝ մինչեւ Հունանի գալը սեղանակիցները 3 շիշ օղի են էին խմել, մեկ շիշ էլ պատվիրել են Հունանի գալուց հետո:
Վկայի խոսքերով՝ վիճաբանություն է եղել Հունանի եւ Խորենի հյուրերից մեկի հետ: Խորենը Հունանից պահանջել է հարգալից վերաբերել իր հյուրի հետ: Մատուցողուհին պատմեց, որ ճաշկերույթի վերջնամասում լսել է վիճաբանության բարձր ձայներ, որից հետո իրենք որոշել են ռեստորանը փակել: Հետո ինքը տեսել է կոտրված մի քանի բաժակ եւ ափսե, սեղանին դրված, ուտելիքը կտրտելու համար նախատեսված դանակը՝ ծռված վիճակում, Խորենին էլ տաղավարից դուրս, մթության մեջ, կողքի ընկած վիճակում:
Մատուցողուհին դատարանում ասաց, որ ինքը չի տեսել, թե դանակն արյունոտ էր: Քանի որ վկայի նախաքննական եւ դատաքննական ցուցմունքների մեջ կային էական հակասություններ, դատավոր Ռաֆիկ Մելքոնյանը որոշեց հրապարակել նրա նախաքննական ցուցմունքը: Այնտեղ Աննան նշել էր, թե ինքը դանակը ծռված ու արյունոտ է տեսել: Դատական այդ նիստում տուժողի իրավահաջորդը իր շահերի նոր ներկայացուցիչ ուներ, վերջինս՝ փաստաբան Հակոբ Սարգսյանը դատարանին 10 օր ժամանակ խնդրեց քրեական գործի նյութերին լիարժեք ծանոթանալու համար: Այս գործով դատական հաջորդ նիստը նշանակված է փետրվարի 26-ին:
Ոսկան ՍԱՐԳՍՅԱՆ
