Ռոբերտ և Սեդրակ Քոչարյանները կրկին հայց են ներկայացրել ընդդեմ «Ժամանակ» օրաթերթի հիմնադիր և հրատարակիչ «Սկիզբ մեդիա կենտրոն» ՍՊԸ-ի և «Առաջին լրատվականի» հիմնադիր և պատասխանատու «Առաջին լրատվական» ՍՊԸ-ի: Պահանջը՝ պատիվը և արժանապատվությունը արատավորող տեղեկությունների հերքումն է լրատվամիջոցի կողմից և 5 միլիոն դրամի փոխհատուցումը:
Aravot.am-ը «Սկիզբ մեդիա կենտրոն»- ի ներկայացուցիչ Նիկոլայ Բաղդասարյանի հետ զրույցում տեղեկացավ գործի մանրամասներին: Փաստաբանը փոխանցեց հետևյալը. «Հայցը ներկայացվել է Ռոբերտ Քոչարյանի և Սեդրակ Քոչարյանի անունով, որը վարույթ է ընդունվել դատավոր Ալիկ Սեկոյանի կողմից և մասնակի բավարարվել է հարուցված միջնորդությունը, որով խնդրվել է ընկերության գույքի և դրամական միջոցների վրա արգելանք դնել: Միջնորդությունը բավարարվել է միայն գույքի մասով»:
Հետաքրքվեցինք՝ սա նախադե՞պ է ԶԼՄ-ի գործունեության խոչընդոտման առումով: Պարոն Բաղդասարյանը պատասխանեց. «Հայցը նախադեպ դեռ չի կարող լինել, բայց եթե վճռով անօրինական որոշում կայացվեց և միջամտեց ազատ խոսքի իրավունքին, դա կարող է համարվել: ԶԼՄ-ի գործունեությունը կխոչընդոտվեր, եթե արգելափակվեին իրենց բոլոր հաշիվները: Բայց դեռ նման արգելանք չկա, չնայած միջնորդություն է ներկայացվել դատարան, սակայն դատարանը չի բավարարել: Միայն գույքի վրա է արգելանք դրվել, իսկ հետագայում ինչ քայլեր կձեռնարկեն, դեռ պարզ չէ»:
Տաթև ՀԱՐՈՒԹՅՈՒՆՅԱՆ
