Այսօր Արմավիրի Արշալույս գյուղում Րաֆֆի Հովհաննիսյանին դիմավորելիս գյուղացիները նկատեցին՝ «Րաֆֆի՛ Հովհաննիսյան, նիհարե՛լ եք»: Նախագահի թեկնածուն չհամաձայնեց՝ «Ընդհակառակը, չաղացել եմ»: Մի պապիկ էլ դիետա նշանակեց. «Ֆիզիկական աշխատանք շատ արեք, որ նիհարեք»: Րաֆֆի Հովհաննիսյանն էլ ասաց, որ երբ իրեն ընտրեն, գործի կդնեն, կաշխատի, կնիհարի:
Արշալույսցիների հետ հանդիպմանը նա ասաց, որ ուզում է նոր էջ բացի. «Ես եկել եմ ոչ թե խնդրելու ձեզ: Ես խնդրանք չունեմ: Ձեզ ասում եմ, իմ ձայնը հազիվ 3-4 օր կդիմանա, բայց ես եկա ասելու, որ մեր պայքարը երեխայի, հայրենիքի ապագայի համար է: Ամեն մեկը պիտի պատասխան տա, եւ կապ չունի՝ իր անունն ինչ է՝ հրամանատարներ, զինվորներ… բոլորս նույնն ենք, եւ բոլորս պիտի դատվենք օրենքի առջեւ»:
Տեսնելով, որ արշալույսցիները ջուր չունեն եւ աղբյուրից տարայով ջուր են լցնում, կրում, Րաֆֆի Հովհաննիսյանը մեկ տարա ջուր ինքը լցրեց աղբյուրից ու օգնեց գյուղացուն:
Նա նորից իր խոսքում ասաց, որ ում ուզում եք՝ ընտրեք՝ Րաֆֆիին, Հրանտին, Սերժին, Պարույրին, բայց ազատ ընտրեք. «Ես գիտեմ, որ գյուղը սրբավայր է: Ոչ միայն հողը, եկեղեցին, պապու գերեզմանը, այլ նաեւ գյուղը, գյուղացու թասիբը: Ես գնում եմ: Գնում եմ այս երեխաների ապագայի համար: Ես բիզնես չունեմ, ես չեմ հարստանալու: 5 տարի հետո արշալույսցիները ունենալու են ավելի լավ կյանք, եթե վերադարձ չկա՝ արտագաղթի փոխարեն, 5 տարի հետո ես չկամ»:
Կարդացեք նաև
Հռիփսիմե ՋԵԲԵՋՅԱՆ
