«Գայան, մի հատ շուտ ավել-սավոկը վեկալ արի, էս ջրերը հավաքի, լցրա մե վեդրոյի մեջ`ստեղ մաքրի»
Այսօր ՀՀ նախագահի թեկնածու, գործող նախագահ Սերժ Սարգսյանի նախընտրական քարոզարշավը մեկնարկեց Վարդենիսից: Այստեղ նրան դիմավորեցին «Դեպի ապահով Հայաստան» պաստառներով, դրոշներով ու շարֆերով: Մինչ նախագահի գալը, Վարդենիսի քաղաքապետ Վոլոդյա Խլոյանը նախապատրաստական աշխատանքներ էր տանում, հրահանգներ էր տալիս: «Գայան, մի հատ շուտ ավել-սավոկը վեկալ արի, էս ջրերը հավաքի, լցրա մե վեդրոյի մեջ`ստեղ մաքրի»,- ասաց քաղաքապետը:
Գայանը մեկ ուրիշ կնոջ հետ շտապեց քաղաքապետի հրահանգը կատարել ու «Դեպի ապահով Հայաստան» շալերով կանայք ջանասիրաբար մաքրում էին մշակույթի տան բակը:
Դրսում շատ մարդիկ կային, սակայն, ներս մտնել չկարողացան: «Տո, հենց ըտենց էլ գրա, չեն թողում, ասում են տեղ չկա, սաղ հիմնարկներից բերել-լցրել են»,- ոստիկանների խիստ հայացքը շրջանցելով՝ հարցիս պատասխանց մի երիտասարդ`ընկերոջ սաստող հայացքին ու խոսքին էլ հակադարձելով. «Հա, լավ էլ անում եմ»:
Կարդացեք նաև
Ավելի ուշ Վարդենիսի քաղաքապետը Aravot.am-ի հարցերին պատասխանեց:
–Դրսում շատերը կային, որ ցանկանում էին ներս գալ, բայց ասացին`չեն թողնում:
– Ո՞վ ա ասում, եթե լրացված ա, որտեղ նստեն: Գան իմ գիրկը նստե՞ն, ցավդ անեմ: Ովքեր ժամանակին եկել են, մտել են, տեղավորվել են, էլ չենք կարող մարդկանց բերել:
–Դրսում մարդիկ ասացին, որ բոլոր հիմնարկներից էլ բերել են:
-Ըտենց բան չկա ցավդ տանեմ, ազատ հոսք ա, մարդիկ եկել են դահլիճ`լսելու մեր թեկնածուին: Ուրիշ խնդիր չեմ տեսնում: Էստեղ որ եկաք, որեւիցէ մեկը բռնացա՞վ:
– Մենք լրագրողներ ենք, մերն ուրիշ է:
-Հա՞, խի՞, դուք արտոնյալ ե՞ք:
–Իսկ ի՞նչ հարցեր եք ասել, որ տան նախագահին:
-Ի՞նչ հարց:
–Հիմա նախագահը պիտի հարցնի`ժողովուրդ ի՞նչ հարցեր ունեք. Չե՞ք ասել`ով եւ ինչ հարց տա:
-Ժողովուրդը ինչ հարց ուզում ա, թող տա, ըտենց բան գոյություն չունի, ի՞նչ եք ասում:
Նելլի ԳՐԻԳՈՐՅԱՆ
Ստրուկները տեղին տեղին,
Ջուրն են սրբում ամբողջ գեղի,
Ստրկատերն է շուտով գալու,
Սուտ խոստումներ շռայլելու: