«Եթե համարում եք, որ լավ չեմ աշխատել, փորձեք ուրիշին ընտրեք, միգուցե ձեր գործերն ավելի լավ կգնան»,- այսօր Վարդենիս քաղաքում ընտրողների հետ իր հանդիպումն այսպես սկսեց ՀՀ նախագահի թեկնածու, գործող նախագահ Սերժ Սարգսյանը: Ապա անդրադառնալով քարոզարշավի ընթացքին, Սերժ Սարգսյանն ասաց, որ այս ընթացքում ինքը մեկ անգամ եւս համոզվել է, որ դեպի ապահով Հայաստան տանող ճանապարհը պետք է անցնենք աշխատանքի միջոցով. «Պետք է արժանապատիվ ապրուստ: Իսկ դա բարեգործությամբ չի լինում: Բարեգործությունը նորմալ է, բայց ամեն մարդ պիտի հնարավորություն ունենա իր քրտինքով ու ազնիվ աշխատանքով վաստակել իր ընտանիքի ապրուստը»:
Նախագահն ասաց, որ պետք է բարձր աշխատավարձով աշխատատեղեր ստեղծվեն: Անդրադառնալով անցյալ տարի Հայաստանի տնտեսության գրանցած 7% տնտեսական աճին, նախագահն ասաց, որ տնտեսական աճն ու տնտեսական ակտիվությունը պետք է գեղեցիկ թվերից վերածվեն բյուջետային միջոցների ու այդ նպատակով իր իշխանությունը Հայաստանի տնտեսության կերպարանափոխման գործընթաց է սկսել, որի ընթացքում պետք է վերականգնվեն նախկին տնտեսական հզորությունները եւ զուգահեռաբար ստեղծվեն նորերը:
Այդտեղ նախագահն առավելապես կենտրոնացավ տնտեսության եւ գործարար միջավայրի խնդիրներին, ասաց, որ թեեւ միջազգային հեղինակավոր կազմակերպությունների տվյալներով անցյալ տարի Հայաստանը բարձր հորիզոնականներ է զբաղեցրել, բայց դա մեզ չի բավարարում:
«Հեշտ չէ, անլուծելի էլ չէ: Հեշտ լիներ՝ վաղուց արված կլիներ: Բայց դե հեշտ գործերը ծույլերի համար են, որ մի քիչ անեն ու…»,- ասաց Սերժ Սարգսյանը: Նա նաեւ հավելեց, որ ինքն այն կարծիքին չէ, որ մեր դժվարությունների եւ խնդիրների մեղավորը միայն իշխանությունն է կամ ընդդիմությունը, կամ հարուստները, կամ չինովնիկները: «Այս երկիրը մերն է իր բոլոր զավակներով՝ ուժեղով, թույլով, իմաստունով, անհամբերով, ծերով, ջահելով… Մեր ապագայի համար պատասխանատվությունը բոլորինս է՝ ընդդիմությանը, իշխանությանը, ժողովրդինը: Հաղթանակն էլ բոլորինս է: Մեկի կորուստը բոլորինս է, մեկի երեխան բոլորիս հույսն է: Հայաստանը պարզապես հիմնարկ չէ, որից ակնկալիք ու պահանջ են ունենում, Հայաստանը մենք ենք, մեր ջերմությունը, մեր զավակները, այն, ինչը մենք կարող ենք թողնել մեր զավակներին»,- ասաց Սերժ Սարգսյանը, հավատով, որ ամեն նոր տարի ստեղծելու ենք ավելի լավ Հայաստան:
Կարդացեք նաև
Նա վարդենիսցիներին կոչ արեց, որ յուրաքանչյուրն իր տեղում ավելացնի ջանքերը Հայաստանի հզորացման գործին, իսկ գործազուրկներին հորդորեց, որ հույսը չկորցնեն, այլ ավելի ամրապնդեն այն ուժը, որ անպայման աշխատանք են ունենալու:
Նելլի ԳՐԻԳՈՐՅԱՆ
Բացարձակ,՝ կոմերտական առաջնորդի ելույթ է, միայն մի քանի ֆրազներ կրճատած,՝ մեր Լենինը,
մեր կուսակցությունը, մեր Բրեժնևը: Խայ-տա-ռա-կութ-յուն: