Այսօր Երեւանի պետական համալսարանի բակում մի խումբ ակտիվիստներ կազմակերպել էին «Շարժիչ ուժը երիտասարդությունն է» խորագրով ակցիա:
Ցուցարարների կարծիքով՝ ներկայիս վարչախումբը, հենվելով իր վերահսկողության տակ գործող բուհերի վարչական մարմինների եւ ուսխորհուրդների վրա, կարողացել է մշտապես չեզոքացնել երիտասարդության ակտիվությունը:
Ակտիվիստ Նվարդի կարծիքով՝ այսօրվա երիտասարդների մեծ մասը տեղյակ չեն , թե ինչ է կատարվում իրենց շուրջը. «Երիտասարդությունը կարող ուժ է, բայց հաճախ իր ուժերը չի ծառայեցնում նպատակին: Բուհերում գործող ուսանողական խորհուրդները կոռումպացված են»:
Ակցիայի կազմակերպիչներից Կարեն Հարությունյանը հավաստում է, որ այսօր բոլոր պետական բուհերը քաղաքականացված են. «Բավական է նշել այն փաստը, որ պետական բուհերի խորհրդի նախագահները հենց Հանրապետական կուսակցության լիդերներն են՝ Սերժ Սարգսյան, Տիգրան Սարգսյան եւ այպես շարունակ»:
Կարդացեք նաև
ԵՊՀ ռեկտորի օգնական Գեւորգ Մելքոնյանը ակտիվիստներից փորձեց պարզել նրանց նպատակը, ինչը վերջիններիս ըմբոստանալու տեղիք տվեց: Ակցիայի կազմակերպիչները ռեկտորի օգնականից ուզում էին պարզել՝ ի՞նչ մեթոդով են ընտրվում անվանական թոշակ ստացող ուսանողները եւ արդյոք ինքը, լինելով Հանրապետական կուսակցության անդամ, համալսարանի տարածքում քարոզչությամբ չի՞ զբաղվում:
«Անվանական թոշակ ստանում են միմիայն գերազանց առաջադիմություն ունեցող եւ հասարակական ակտիվություն ցուցաբերող ուսանողները: Իսկ ինչ վերաբերում է քարոզչությանը, ապա ես դրանով զբաղվում եմ համալսարանի տարածքից դուրս եւ աշխատանքային օրվա ավարտին միայն»,-նշում է ռեկտորի օգնականը:
Ըստ Մելքոնյանի՝ նախընտրական այս թոհուբոհի ժամանակ նմանատիպ ակցիաներն էլ ավելի լարված մթնոլորտ են ստեղծում: Ակտիվիստներին նա հորդորեց՝ ակցիան այլ վայրում կազմակերպել: Բայց մասնակիցները պնդեցին, որ դա իրենց որոշելիքն է, երթով լինելու են ՀՀ տարբեր բուհերում եւ շարունակելու են իրենց քաղաքացիական քարոզչությունը:
Սեւակ ՎԱՐԴՈՒՄՅԱՆ
