Դատարանը որոշեց վկային բերման ենթարկել
Լեյտենանտ Արտակ Նազարյանի մահվան գործով դատավարության փետրվարի 12-ի նիստում դատավոր Սամվել Մարդանյանը ընթերցեց ոստիկանության Հրազդանի բաժանմունքից ստացված գրությունը, որտեղ նշվում է, թե որպես վկա դատակոչված Համլետ Աղամիրյանը փետրվարի 4-ին Հրազդանից մեկնել է Երեւան, նրա գտնվելու վայրը հարազատներին հայտնի չէ, նրա հետ հեռախոսային կապ չկա: «Կարո՞ղ է բանջարի է գնացել»,-հարցրեց տուժողի իրավահաջորդ Ծովինար Նազարյանը, ասելով, որ այս գործով վկաներ կան, ովքեր բանջարի են գնում ու չեն վերադառնում:
Տուժողի իրավահաջորդի ներկայացուցիչ, իրավապաշտպան Ռուբեն Մարտիրոսյանը հայտարարեց, թե դատարանը մեկ տարվա ընթացքում չի կարողանում ապահովել Աղամիրյանի ներկայությունը, որ եթե դատավորը փետրվարի 3-ին կամ 4-ին ծանուցագիր ուղարկեր Աղամիրյանին, վերջինիս ներկայությունը դատարանում ապահովված կլիներ: Ռուբեն Մարտիրոսյանն ասաց, որ Հ. Աղամիրյանը իր ծառայակիցների` քրեական գործով ամբաստանյալների դեմ ցուցմունքներ է տվել, մասնակցել մի շարք դատաքննչական գործողությունների եւ միջնորդեց նրան հարցաքննության համար դատարան բերման ենթարկել: Դատավոր Մարդանյանը բավարարեց այդ միջնորդությունը:
Ռ. Մարտիրոսյանը դատարանում հանդես եկավ նոր միջնորդություններով: Նա հայտարարեց, որ վկա Արման Մնացականյանը ցուցմունք է տվել,թե կապրոնե շշի պատճառով 2010թ. հուլիսի 19-ին կապիտան Հակոբ Մանուկյանի եւ Ա. Նազարյանի միջեւ տեղի ունեցած վիճաբանության մասին Հ. Մանուկյանը զեկուցել է իր անմիջական վերադասին` զորամասի հրամանատարի անձնակազմի հետ տարվող աշխատանքների գծով տեղակալ փոխգնդապետ Եղոյանին: Իրավապաշտպանն ասաց, որ Եղոյանին որպես վկա դատարան հրավիրելով `իրենք ցանկանում են պարզել, թե այդ միջադեպի վերաբերյալ զեկույց ստանալուց հետո Եղոյանը ի՞նչ քայլեր է ձեռնարկել, Եղոյանը կարող է ներկայացնել նաեւ Ա. Նազարյանի այդ ժամանակվա հոգեբանական վիճակը,քանի որ դատարանը մերժել է Նազարյանի հետմահու դատահոգեբանական կրկնակի, լրացուցիչ փոձաքննություններ անցկացնելու համար ներկայացված միջնորդությունները: Դատավոր Մարդանյանը որոշեց, որ դատարանն այդ միջնորդությանը կանդրադառնա խորհրդակցական սենյակում, վերջնական դատական ակտ կայացնելու ժամանակ:
Կարդացեք նաև
Ռ. Մարտիրոսյանը դատարանին միջնորդեց հարցում ուղարկել ՀՀ առողջապահության նախարարության դատաբժշկական կենտրոն` պարզելու համար, թե ինչ է նշանակում Ա. Նազարյանի հետմահու դատաբժշկական փորձաքննությունն անցկացրած դատական փորձագետ Վիգեն Ադամյանի եզրակացության մեջ առկա Ա. Նազարյանի «մահից ոչ շատ առաջ» եզրույթը: Իրավապաշտպանն ասաց, որ Նազարյանի ստացած վնասվածքները ժամանակային առումով գնահատելով` Վ. Ադամյանը դատարանում հայտարարեց` «մահից ոչ շատ առաջ» ասելով ինքը նկատի էր ունեցել նաեւ մահից մինչեւ 3 օր առաջ: Դատավորը մերժեց այս միջնորդությունը, նշելով, որ դատական բժշկությունը չի կարող պարզել ստացած վնասվածքների ստույգ ժամանակը, փորձագետների նշած ժամկետները մոտավոր են:
Ծովինար Նազարյանը հայտարարեց, որ իր շահերը ներկայացնող փաստաբան Մուշեղ Շուշանյանը երկու միջնորդություն պետք է ներկայացնի, սակայն Շուշանյանը նիստից բացակայում է : Քանի որ դատավարության մյուս կողմերը միջնորդություններ չունեին ներկայացնելու, ավարտում է դատաքննության լրացման միջնորդությունների փուլը, դատավորը որոշեց նիստը հետաձգել: Հաջորդ նիստը նշանակված է փետվարի 26-ին:
Ոսկան ՍԱՐԳՍՅԱՆ
