«Տարիներ շարունակ փորձել ենք ապահովել ընտրական ընթացակարգերը, բայց, ինչպես ասում են, ժամանակն անում է իրենը: Ներկայումս իշխանությունը, քաղաքական ուժերը եւ ժողովուրդը տրամադրված են, որպեսզի լինեն այնպիսի ընտրություններ, որ հեռու մնանք ասեկոսեներից, եւ ՀՀ-ում ձեւավորվեն նոր մոդելներ` հասկանալով, որ ժամանակներն անցել են»,-Ռամկավար Ազատական կուսակցության հանրապետական վարչության կողմից այսօր` Թեքեյան կենտրոնում մտավորականների մասնակցությամբ կազմակերպված քննարկման ժամանակ ասաց ՀՀԿ փոխնախագահ Գալուստ Սահակյանը:
Նրա դիտարկմամբ. «Նոր սերնդի համար դաշտը պետք է այնքան պարզ լինի, որպեսզի առաջանան նոր քաղաքական ուժեր եւ տեսակետներ: Վերջին հաշվով` որքան էլ տարամերժ լինեն կարծիքները, մենք արդեն ունենք բանիմաց, պատրաստված երիտասարդ գործիչներ, ովքեր տարբեր քաղաքական ուժերի ներկայացուցիչներ են: Այս ընթացքում քաղաքական ուժերը փորձում են որոգայթների ճանապարհով գնալ եւ ստեղծել մի ծայրահեղական վիճակ` քննադատելով կոռուպցիան, արտագաղթը: Այդ մեղադրանքները, բնականաբար, ամբողջությամբ իր վրա պետք է վերցնեն գործող իշխանությունները: Բայց մի բան չի հասկացվում, որ ծայրահեղական մոտեցում ունեցող ցանկացած քաղաքական ուժ ունի իր համակիրները: Եթե առավոտից իրիկուն «փրկչի» դերում է հանդես գալիս եւ փորձում է ամեն ինչ սեւացնել, թե Հայաստանը ճակատագիր չունի, թե Հայաստանն արդեն փլուզման եզրին է, բնականաբար, համակիրները պետք է թողնեն երկիրը եւ հեռանան: Այսինքն` եթե արտագաղթ կա, մեղավոր են բոլորը, եւ առաջին հերթին` իշխանությունները: Մենք ունենք այդ մոտեցումը, եւ եթե չունենայինք, չէինք կարող լուծման ճանապարհ տեսնել»:
Խոսելով մտավորականներից` պարոն Սահակյանը կարծիք հայտնեց, թե նրանք դեռեւս չեն արժեւորվել. «Մենք ունենք շատ լավ, ուժեղ մտավորականներ, որոնք առաջիկա տարիներին առավել կառուցողական պետք է լինեն: Անկախության տարիներին մտավորականները խաղից դուրս մնացին եւ օտարվեցին քաղաքական պրոցեսներից: Այսօր մտավորականների համակարգ պետք է ստեղծել, որովհետեւ մտավորականները եւ ժամանակն են ստեղծում, եւ ապագան»:
Գալուստ Սահակյանի խոսքով. «Առաջիկա 5 տարում լուրջ ձեռքբերումների արդյունքում կստեղծվի դաշտ, որպեսզի մտավորականներն ազատ գործեն. նրանք են, որ գաղափար են տալիս եւ հասարակության համար ճանապարհ հարթում: Ինձ կարող են չհավատալ, բայց մտավորականին ժողովուրդն ավելի կհավատա»:
Կարդացեք նաև
Լուիզա ՍՈՒՔԻԱՍՅԱՆ
