Այսօր Ավան եւ Նոր Նորք վարչական շրջանների ընդհանուր իրավասության դատարան էր ներկայացել դատաբժշկական փորձաքննությունների բյուրոյի փորձագետ Գեւորգ Գաֆարյանը: Նա հրավիրվել էր «Հարսնաքար» ռեստորանային համալիրում բռնարարքների պատճառով մահացած ռազմական բժիշկ Վահե Ավետյանի գործով:
Մինչ փորձագետին լսելը, հետազոտվեց դիակի դատաբժշկական փորձաքննության եզրակացությունը, 8 թերթի վրա պատկերված նկարները: Ապա պաշտպան Միհրան Պողոսյանը միջնորդեց, որպեսզի հրապարակվեն նաեւ տուժողներ Արտակ Բայադյանի, Գարիկ Սողոմոնյանի դատաբժշկական փորձաքննության եզրակացությունները: Մեղադրող Արթուր Դավթյանն առարկեց այս միջնորդության դեմ, շեշտելով, որ այդ եզրակացությունները տրվել են տարբեր փորձագետների կողմից, ուստի դատարան հրավիրված փորձագետը իրավասու չէ հետագայում պատասխանել հարցերին:
Փորձագետ Գեւորգ Գաֆարյանը հայտնեց, որ Վահե Ավետյանի մահը վրա է հասել փակ գանգուղեղային վնասվածքներից, գլխուղեղի կենսական կարեւոր ֆունկցիայի խանգարումից: Այնուհետեւ պատասխանելով մեղադրողի հարցերին, նա նկարագրեց Վահե Ավետյանի մարմնին առկա վնասվածքները, մասնավորապես՝ վերջույթների շրջանում, ստորին ծնոտին: Նույնիսկ առկա էին արյունազեղումներ, որոնց առաջացման պատճառը չբացառվեց, որ եղած լինի վիրահատական միջամտությունը: Մասնավորապես փորձագետը վիրահատող բժշկից մեջբերում արեց: Ըստ այդ մեջբերման՝ «այդ հատվածում փակ հյուսվածքների սալջարդ առկա չէր»: Բժիշկը նկատի էր ունեցել մինչ վիրահատությունն ընկած ժամանակը:
Մեղադրողին հետաքրքրում էր նաեւ՝ արդյոք կյանքի հետ անհամատեղելի վնասվածքներ ունեցե՞լ է Վ. Ավետյանը, երբ տեղափոխվել է հիվանդանոց, կարո՞ղ էր բժիշկն ասել՝ վերջ, կարելի՞ էր փրկել Ավետյանին: Փորձագետն այս կապակցությամբ հայտնեց, որ Վահե Ավետյանի գլխի վնասվածքները կապ են ունեցել նրա մահվան հետ, իսկ բժիշկը ցանկացած դեպքում պարտավոր է օգնել տուժողին, քանի դեռ մահը վրա չի հասել:
Կարդացեք նաև
Ռուզան ՄԻՆԱՍՅԱՆ
