Հոգեբան Աշոտ Հակոբյանի գնահատմամբ, այսօր Հայաստանի Հանրապետության վիճակը ծանր կայուն է
Aravot.am-ի հետ զրույցում հոգեբան Աշոտ Հակոբյանը կարծիք հայտնեց, որ մեր երկրում հասարակության գրեթե բոլոր անդամները ձգտում են պահպանել ստեղծված իրավիճակը` բացառելով բոլոր տեսակի փոփոխությունները: «Ամբողջ հասարակությունը հենց այսպես էլ մտածում է, հայ մարդու գործողությունների առանցքում հետևյալ դատողությունն է` վերքիս ձեռք մի տվեք, թողեք էսպես էլ մնա, ես չեմ վստահում որևէ մեկին, որ իմ վիրակապը հանի ու փորձի վերքս մշակել: Էս պահին ոչ մեկին չեմ վստահում, թեկուզև գիտեմ, որ վիրակապի տակ գուցե և ծանր գործընթացներ են, ցավոտ է , բայց քանի որ ես չեմ գտել այն բժշկին, որ վստահեմ իմ դարդն ու ցավը, հետևաբար և թողեք էսպես մնա: Այսինքն մենք կայուն ծանր վիճակում ենք, միջամտություն էս պահին չպետք է անել», -բնութագրում է հոգեբանը:
Մեր զրուցակցի համոզմամբ, ցավալիորեն կայուն ծանր վիճակը դեռ կշարունակվի , քանի դեռ չի եկել այն պահը, որ բոլորը վերագնահատեն իրենց գործողությունները, ցույց տան հայրենանվեր լինելը: Ըստ Աշոտ Հակոբյանի, Հայաստանում շատերն են խոսում համակարգային փոփոխություններից ` առանց պատկերացնելու, թե դա ինչ է: Իսկ ամենաողբերգական այն է, որ քաղաքական կուսակցությունները գոյություն ունեն միայն երևակայության մեջ, քաղաքական գործիչներն էլ չեն կարողանում գոնե հստակ ներկայացնել իրենց քաղաքական գաղափարները:
«Քո գաղափարական ընկալումների մեջ դու պիտի կուսական վիճակ ունենաս, և եթե կուսակցական ես , ապա այդ գաղափարաբանությունից չպիտի շեղվես: Հայրերեն բառը ինքը հուշում է, որ կուսակցությունը կույս բառից է, մեջ կուսական վիճակ պիտի ունենաս, միչդեռ կուսակցական տեսանկյունից դարձել են մեկ-մեկ անբարոներ, հռչակում են մի բան, վարվում են ուրիշ կերպ: Դա նույն է, որ եկեղեցու քահանաները, որոնք մտնում են միաբանության մեջ, կուսակրոն են համարվում, արդեն ինքը աբեղա է, կուսական վիճակի մեջ է իր հավատքների ընկալումների, վարկի, ապրելու ձևի տեսանկյունից: Վարդապետական գիտելիքների հարաբերությամբ քահանան չի զիջում աբեղային, բայց սա քահանա է կոչվում, սա կոչվում է կուսակրոն աբեղա: Այ,քաղաքական գործիչը սովորական քաղաքացին չէ, ինքը կուսակրոն է իր գաղափարական ընկալումների մեջ և հանկարծ տանը նստած հայտնաբերել է, որ ինքը ասենք ազգային պահպանողական գաղափարի կրողն է»:
Կարդացեք նաև
Իսկ ինչպե՞ս է գնահատում իշխող կուսակցության դիրքերը Շիրակի մարզում, համամի՞տ է հնչող այն տեսակետների հետ, թե մեծամասամբ երևելիներին են փորձում ընդգրկել այս կուսակցության շարքերը, մեր զրուցակիցն ասաց. «Ստիպված եմ նորից կրկնել, ես չեմ գտնում, որ կան կուսակցականներ, սա է խնդիրը: Եթե խոսքը Հանրապետական կուսակցության մասին է, ինչքան ես եմ հասկանում, գիտեմ, այս կուսակցությունը ազգային-պահանողական կուսակցություն է, բայց իր գործողությունների մեջ ազգային-պահպանողական ուղեգծի ոչ մի դրսևորում չեմ տեսնում: Այս կուսակցությունը իրոք կարող էր շահեկան ծառայել հասարակության համախմբմանը, բայց դուք տեսե՞լ եք դա, մեր տեսածը եվրոպական արժեքների ներմուծում, բավականին վթարված կրթական համակարգ, բավական վթարված մշակութային հարաբերություններ և այլն են: Եվ սա արել են ազգային պահպանողական գործիչնե՞րը, ծիծաղելի է ուղղակի: Շատերին ճանաչում, հարգում ու ընդունում ես որպես մարդ, բայց ասում ես` եղբայր, դու ո~ւր, կուսակցությունն ո~ւր: Հասկանում ես, որ նա սրանով լուծում իր սոցիալական պաշտպանվածության խնդիրը, ներանձնային խնդիրը , բայց պետք է կանգնենք, էսպես ո՞ւր ենք գնում»,- հարցնում է հոգեբանը:
Նունե ԱՐԵՎՇԱՏՅԱՆ
սս-ի ծրագիրը,՝ երկրի կործանման ծրագիրն է: