Դասագրքերը ծանրաբեռնված են փաստերով
Տավուշի մարզի Բերդավան գյուղից պատմության բազմափորձ ուսուցիչ Սամսոն Խոջոյանի համոզմամբ՝ավագ դպրոցի բնագիտամաթեմատիկական եւ ընդհանուր հոսքերի հայոց պատմության դասագրքերը խիստ ծանրաբեռնված են փաստական տվյալներով:
Նրա խոսքերով՝ 11-րդ դասարանի «Հայոց պատմություն» դասագրքի (գլխավոր խմբագիրներ` Աշոտ Մելքոնյան, Արամ Սիմոնյան) 1917-1920 թթ. պատմության շարադրանքում օգտագործված է մոտ 200 թիվ: Ս. Խոջոյանն ասում է, որ 10-րդ,11-րդ եւ 12-րդ դասարանների պատմության դասագրքերում, որոնք ընդհանուր առմամբ ունեն 580 էջ, օգտագործված է ընդհանուր առմամբ մոտ 3000 թիվ, շուրջ 9000 անուն, անվանում,տեղանուն, դրանց հետ մեկտեղ դասագրքերը լի են տարբեր հասկացություններով, պայմանագրերի եւ այլնի մասին տեղեկություններով:
Իսկ բուհ ընդունվելու հարցաշարը դասագրքերի համեմատ բեռնաթափված է ընդամենը 30-35 տոկոսով: «Երեխաներին գիտելիքախեղդ են անում, որի հետեւանքով նրանք պատանեկություն չեն վայելում»,-ասում է բազմափորձ ուսուցիչը:
Կարդացեք նաև
Նրա խոսքերով՝ աշակերտները գերհոգնում են, քանի որ մյուս առարկաների ուսուցումը եւս մեծ ջանքեր է պահանջում: Խոջոյանն ուսուցումը համեմատում է սնման հետ, որ թերսնումը պակաս վտանգավոր է, քան ավելորդ սնունդով օրգանիզմը ծանրաբեռնելը:
Նա ասում է, որ մինչեւ ավագ դպրոցին անցնելը դպրոցներում օգտագործվող,Վլադիմիր Բարխուդարյանի խմբագրությամբ տպագրված 5-րդ, 6-րդ, 7-րդ, 8-րդ դասարանների պատմության դասագրքերում ընդհանուր առմամբ մոտ 600 թիվ կար, այդ դասագրքերը ծանրաբեռնված չէին: Սամսոն Խոջոյանը նշում է , որ հայոց պատմության դասագրքերը լի են անհարկի մանրամասնություններով, օրինակ դասագրքում նշվում է, որ 1917 սեպտեմբեր-հոկտեմբերին կայացել է արեւելահայության առաջին համագումարը, ստեղծվել է 35 հոգուց բաղկացած Ազգային ժողով, որն իր կազմից ընտրել է 15 անդամ ունեցող գործադիր մարմին՝ Ազգային խորհուրդ, որի նախագահն էր Ավետիս Ահարոնյանը,քարտուղարը՝ Նիկոլ Աղբալյանը: Դասագրքում նշված են բոլոր 15 անդամների անունները, թե նրանցից ով որ կուսակցությունից էր կամ՝ անկուսակցական: Ս. Խոջոյանի համոզմամբ՝ կարիք չկա այդքան մանրամասնելու, դասագրքերում հիմնական,պարտադիր նյութը պետք է լինի ավելի խոշոր տառաչափերով, իսկ լրացուցիչ տեղեկատվությունը՝ ավելի մանր: Ս. Խոջայանն ասում է, որ դասագիրք գրելու համար յուրահատուկ տաղանդ է հարկավոր, դրանք գրելիս պետք է հաշվի առնվեն երեխաների տարիքային, ֆիզիոլոգիական եւ այլ առանձնահատկություններ:
Ոսկան ՍԱՐԳՍՅԱՆ
