Մահափորձից հետո «Սուրբ Գրիգոր Լուսավորիչ» կենտրոնում բուժում ստացող նախագահի թեկնածու Պարույր Հայրիկյանը ասաց, թե տեղյակ է, որ իր գործով կան ձերբակալվածներ:
«Կատարողը եւ նրան անմիջականորեն օգնողը, այսինքն առայժմ գործիքներն են բացահայտված: Պատվիրատուի մասին դեռ խոսք չկա», – ասաց Հայրիկյանը:
Հարցին, թե սպասո՞ւմ էր, որ այդքան շուտ կբացահայտվեր մահափորձ կատարողների ինքնությունը, Հայրիկյանը պատասխանեց. – «Եվ սպասում էի, եւ ոչ: Սպասում էի, որովհետեւ գիտեի, որ նյութերը շատ են, չէի սպասում, որովհետեւ ընդհանրապես այսպիսի գործերը աշխարհի բոլոր երկրներում ձգձվում են: Ուրախ եմ, որ ինչ-որ բան արդեն հասել են: Դեռ որեւէ քննչական գործողություն չի կատարվել լրացուցիչ»:
Հայրիկյանը ասաց, որ մահափորձի օրը ինքը նկատել է մեկ ավտոմեքենա եւ մեկ մարդ. – «Թե մեքենայում քանի հոգի կար, դժվար է ասել», – ասաց նա:
Կարդացեք նաև
Անդրադառնալով իր այն պնդմանը, թե կրակողը «ոչ հայկական դիմագծեր ուներ», Հայրիկյանը ասաց. – «Ես կարծեմ, նույնիսկ ասել էի` եվրոպական դիմագծեր: Բոլոր երկրներում սեւ գործը կատարողները լինում են տեղացի մարդիկ: Այդպես ընդունված է: Հիմա արդեն կարող ենք ասել` քննությունը կփորձի պարզել, բայց քննությունն էլ կարող է ինչ-որ սահմանով պարզել, կախված է, թե պատվիրատուն որքանով է պատրաստած: Քաղաքական պատվեր տվողները սովորաբար աշխատում են այնպես անել, որ քաղաքական պատվերը հստակ չերեւա»:
Նախագահի թեկնածուն ասաց, որ այսօր իր գործընկերների հետ քննարկելու է ընտրությունները հետաձգելու համար Սահմանադրական դատարան դիմել-չդիմելու հարցը:
«Տարբերակները շատ են: Այսպես ակնհայտ է, որ ես քարոզարշավի չեմ մասնակցում, չեմ կարող մասնակցել, նաեւ բժիշկներն են արգելում… մոտ հինգ տարբերակ կա, որ մենք պիտի քննարկենք հիմա եւ եզրակացության հանգենք այդ տարբերակների քննարկումից, որովհետեւ եթե չես մասնակցում քարոզարշավին, նշանակում է` դու չես կատարում թեկնածուի պարտականությունները», – ասաց Հայրիկյանը:
Մանրամասն՝ կարդացեք այստեղ
