Կապանում գործող «Կայուն զարգացում» հասարակական կազմակերպությունը հաշվի առնելով վերջին շրջանում Սյունիքի մարզի հողատարածքները (արոտավայրերը) իրանացիներին վարձակալությամբ հատկացնելու շուրջ բարձրացած մեծ աղմուկն ու հանրության շրջանում առկա մտահոգությունները` այսօր բաց նամակով դիմել է անշարժ գույքի կադաստրի պետական կոմիտեի նախագահ Երվանդ Զախարյանին` հողատարածքների վերաբերյալ անհրաժեշտ տեղեկատվություն ստանալու նպատակով:
«Խնդրում ենք Ձեզ, տրամադրել Սյունիքի մարզում 2012-2013թթ. ընթացքում պետական և համայնքային սեփականություն հանդիսացող հողերի վարձակալության և վաճառքի պայմանագրերի մասին ներքոնշյալ տեղեկատվությունը:
Նշել վերոնշյալ ժամկետում, 5 հա և այն գերազանցող պետական և համայնքային սեփականություն համարվող, վարձակալության և վաճառքի գործարքի օբյեկտ հանդիսացած յուրաքանչյուր հողամասի.
Կարդացեք նաև
- Իրականացված գործարքի ամսաթիվը,
- Գործարքի տեսակը /վարձակալություն թե վաճառք/
- Վարձակալության ժամկետը, եթե գործարքը հանդիսանում է վարձակալություն
- Գործարքի օբյեկտ հանդիսացող հողամասի մակերեսը
- Գործարքի արժեքը
- Հողամասը պատկանող համայնքի անվանումը
- Գնորդի կամ վարձակալողի մասին հետևյալ տեղեկատվություն /Ֆիզիկական անձի դեպքում` անուն, ազգանուն, հայրանուն, բնակության վայր, գրանցման հասցե: Իրավաբանական անձի դեպքում` ընկերության անվանումը, գրանցման վայրը/
- Գործարքի օբյեկտ հանդիսացող հողամասի աշխարհագրական կոորդինատները:
«Կայուն զարգացում» հ/կ-ն անհրաժեշտության դեպքում պատրաստակամ է օրենսդրությամբ սահմանված կարգով փոխհատուցել վերոնշյալ տեղեկատվության տրամադրման համար կատարված ծախսերը», – նշված է Երվանդ Զախարյանին հասցեագրված բաց նամակում:
«Մենք մտահոգված ենք Սյունիքի մարզի արոտավայրերի շուրջ տեղի ունեցող իրադարձություններով: Այս պահին հողատարածքների հետ կապված իրարամերժ խոսակցություններ են շրջանառվում, ցանկանում ենք վերահսկելի եւ թափանցիկ դարձնել հանրության համար այդ տեղեկությունը, ինչի համար էլ դիմել ենք վերոնշյալ տեղեկատվությունները ձեռք բերելու համար», – «Առավոտին» փոխանցեց Արմեն Փարսադանյանը:
Մերի ՍՈՂՈՄՈՆՅԱՆ
