Լուրջ հնարավորություն է ստեղծվում պահպանել ՀԱԿ-ը
«Քրիստոնյա-ժողովրդական վերածնունդ» կուսակցության նախագահ, ՀԱԿ անդամ Սոս Գիմիշյանն այսօր «Հայելի» ակումբում անդրադառնալով Լեւոն Տեր-Պետրոսյանի մտադրությունը՝ ՀԱԿ-ը կուսակցության վերածելու գաղափարին, նշեց, որ անսպասելի էր, քանի որ թեժ նախընտրական շրջան է: «Կուզենայի, որ լրատվամիջոցները կենտրոնանային այդ թեմային», նկատեց Գիմիշյանը:
Նա նշեց, որ ուրախ է Տեր-Պետրոսյանի գաղափարի համար, բայց համաձայն չէ դրա հետ, քանի որ ՀԱԿ-ը պետք է պահպանել: «Վերջին հարցազրույցից պարզ է դառնում, որ Տեր-Պետրոսյանը քաղաքականությունից չի հեռանում: Եթե Տեր-Պետրոսյանը նախաձեռնում է նոր կուսակցության ստեղծմանը` ապա դա հնարավոր է առողջացմանը նպաստի, բայց ՀԱԿ-ը ճիշտ կլինի պահպանել, եւ նույնիսկ կարող է հեռացածները վերադառնան, ՀԱԿ-ի ստեղծման գաղափարը ընդունելի եւ ողջունելի էր, թեեւ դա ստեղծել է Տեր-Պետրոսյանը», նշեց Գիմիշյանը:
«Աստված տա բացի ՀՀՇ-ից այլ կուսակցություններ էլ գտնվեն, որոնք կմիանան նոր ՀԱԿ կուսակցությանը, որպեսզի չմնա այսօրվա ՀԱԿ-ը, այդ դեպքում իրենց հետ դժվար կլինի առողջացնել պրոցեսը», նշեց Գիմիշյանը:
Կարդացեք նաև
Գիմիշյանը կարծում, էր որ մի շարք կուսակցություններ նախագահական ընտրություններից հետո դուրս էին գալու ՀԱԿ-ից, ուստի Տեր-Պետրոսյանի գաղափարը` այլ կերպ փաթեթավորելով արվեց. «Ես ողջունում եմ, որ այսօր լուրջ հնարավորություն է ստեղծվում պահպանել ՀԱԿ-ը», նկատեց նա:
Իր գործն է, եթե Արարատ Զուրաբյանը ցանկանում է նոր ՀՀՇ ստեղծել, նշեց` Գիմիշյանը: Նա չբացառեց, որ պահպանված ՀԱԿ-ը կարող է ղեկավարել նույնիսկ Հրանտ Բագրատյանը:
Գիմիշյանին զարմացրել է երեկ ՀՀՇ վարչութան նախագահ Արամ Մանուկյանի հարցազրույցը. «ՀՀՇ-ի նախագահը ողջունում է Տեր-Պետրոսյանի գաղափարը, բայց ասում է, հետո կքննարկենք, թե ինչպես է ՀՀՇ-ն վարվելու: Այսինքն, կուսակցության ղեկավարը նույնիսկ տեղյակ չի եղել այդ գաղափարին: Սա է գործելակերպը, որը ցանկանում էինք առողջացնել»:
Գիմիշյանը նշեց, որ ուրախ է, որ Տեր-Պետրոսյանը մնում է քաղաքականության մեջ, թեեւ նախորդ հարցազրույցից տպավորություն էր ստացել, որ հեռանալու է, եւ իր հետ էլ տանելու է համակարգող Լեւոն Զուրաբյանին: «Մի այդքան գերագնահատեք Լեւոն Զուրաբյանին: Լեւոն Զուրաբյանը Տեր-Պետրոսյանի լեզուն, բերանը, ականջն էր ընդամենը», նշեց Գիմիշյանը` հաջողություն մաղթելով նոր նախաձեռնությանը:
Ես իմ բարոյական պարտքն են համարել աջակցել Հրանտ Բագրատյանին, թեեւ Բագրատյանը եղել է ՀՀՇ–ի ու Տեր–Պետրոսյանի վարչապետը. «Բագրատյանը իմը չի եղել, ես ՀՀՇ–ի կառավարության կազմում չեմ եղել, ինձ երբեք չեն էլ առաջարկել ոչինչ, ավելին ես ընդդիմություն եմ եղել ՀՀՇ–ին: Բայց այս 15 տարվա մեջ իշխանություններն ավելի հարգանքով են ինձ վերաբերվել, քան ՀՀՇ–ն: Այսօր էլ նույն վերաբերմունքն է ՀԱԿ–ի կողմից Հրանտ Բագրատյանի նկատմամբ», նկատեց Գիմիշյանը:
Էմմա ԳԱԲՐԻԵԼՅԱՆ
