Մայր Աթոռ Սուրբ Էջմիածնում նշվեց սուրբ Վարդանանց տոնը
Այսօր Մայր Աթոռ Սուրբ Էջմիածնի Գեւորգյան հոգեւոր ճեմարանի դահլիճում տեղի ունեցավ սուրբ Վարդանանց տոնին նվիրված միջոցառում: «Արդեն 4-րդ տարին է, ինչ Հայաստանի Հանրապետության հոգեւոր եւ աշխարհիկ կրթօջախների սաները համատեղ հիշում, խնկարկում ու փառաբանում են Վարդանանց սուրբ նահատակների հիշատակը: Հիրավի, այս տոնը հայրենասիրության եւ ոգու առկայությյան դրսեւորում է: Այսօր երիտասարդ սերունդն անթաքույց ակնածանքով է հիշում քաջ նախնյաց առաքելությունը»,-ելույթի ընթացքում ասաց ԵՊՀ պրոռեկտոր Ռուբեն Մարկոսյանը: Նա նշեց, որ Մայր բուհի ուսանողական խորհրդի եւ մշակույթի կենտրոնի նախաձեռնությամբ հաճախ են կազմակերպվում ռազմահայրենասիրական եւ քրիստոնեական դաստիարակությանն ուղղված միջոցառումներ:
Պրոռեկտորը փաստեց, որ Ավարայրի ճակատամարտում հայրենիքի, Հայ եկեղեցու եւ քրիստոնեական հավատքի պահպանման համար նահատակված Վարդանանց զորավարների հիշատակը անմահ պահելուն զուգընթաց` նաեւ Արցախյան ազատամարտում նահատակված նոր Վարդանների անուններն են ոգեկոչվում. «Պատահական չէ, որ զոհված 27 համալսարանական ազատամարտիկներից հինգը Վարդան էին, եւ ի պատիվ նրանց եւ Ավարայրի Վարդանանց` Մայր բուհի հայրենասիրական դաստիարակության ակումբը կոչվում է «Վարդանանք»:
Մայր Աթոռ Սուրբ Էջմիածնի կրթական հաստատությունների վերատեսուչ տեր Գեւորգ եպիսկոպոս Սարոյանը նշեց, որ վերջին երկու տարիներին ավանդույթ է դարձել Նորին Սրբության անվանակոչությանը նվիրված հանդիսությունը կազմակերպել Գեւորգյան ճեմարանի եւ ԵՊՀ-ի համատեղ ծրագրով. «Այս երեւույթն իրապես իրադարձություն պետք է համարել մեր անկախ Հայաստանի հոգեւոր վերազարթոնքի գործընթացում, քանի որ այն պատմական կարեւորություն է ներկայացնում ինչպես ներկայի, այնպես էլ ապագայի սերունդների դաստիարակության եւ հոգեւոր բնութագրի կերտման համար»:
Կարդացեք նաև
Գեւորգ եպիսկոպոս Սարոյանի խոսքով. «Չգրված օրենք է, որ ցանկացած հայ պետք է իմանա սուրբ Գրիգոր Լուսավորչի, Սահակ Պարթեւի, Մեսրոպ Մաշտոցի եւ Վարդանանց պատմությունների մասին: Դրանք հիման վրա է կերտվել մեր ազգային ինքնությունը»:
Իր խոսքում Ամենայն հայոց կաթողիկոս Ն. Ս. Օ. Տ. Տ. Գարեգին երկրորդը հիշատակեց, որ Վարդանանք աներկյուղ էին. «Նրանց չի ընկճել թշնամի զորքի թվաքանակը եւ առավելությունը, որովհետեւ նրանք գիտեին, որ պատերազմում թիվը չէ, որ հաղթանակ է արձանագրում: Այդ պատերազմում ոգին է զինվորին հաղթանակի առաջնորդում»:
Միջոցառման ընթացքում ելույթներով հանդես եկան Գեւորգյան հոգեւոր ճեմարանի եւ ԵՊՀ-ի երգչախմբերը:
Լուիզա ՍՈՒՔԻԱՍՅԱՆ
