Նորաստեղծ «Նոր Հայաստան» կուսակցության համակարգող խմբի անդամ Բաբկեն Հարությունյանն այսօր նախընտրական շրջանը համարեց տաղտկալի եւ այն պայմանավորեց հիմնական քաղաքական ուժերի բացակայությամբ:
«Ինչի՞ մասին է խոսքը, երբ 2-րդ քաղաքական ուժը, որ ներկայացված է Ազգային ժողովում, կամ արմատական դիրքերից հանդես եկող ՀԱԿ-ը կամ Դաշնակցությունը, որը պարբերաբար խոսում էր իշխանափոխության մասին, քննադատում իշխանությանը, դուրս գրվեցին քաղաքական գործընթացներից: Այս ուժերը գնում են քաղաքական արխիվ, իրականում ընտրել են քաղաքական ինքնասպանության ուղին: Բա ուր մնաց խորհրդարանական օպերացիան, երեք ուժեր կոնսուլտացիաներ էին անում, քննադատում իշխանությանը, գնում էին Եվրոպա բարձրագոչ հայտարարություններ անում, հետո հերքում: Բա ավազակապետություն էիք քանդում ՀԱԿ, ո՞ւր է ավազակապետությունը, ո՞նց եք քանդում: Կամ նույն Վարդան Օսկանյանը օրուգիշեր facebook-ից սկսած բոլոր հարմար առիթներով քննադատում էր իշխանությանը, այլընտրանք էին իրենց հռչակել, ո՞ւր է այլընտրանքը: Իսկ հիմա երեք ուժերն էլ ընտրել են տակից սատարելու ուղին, Սերժ Սարգսյանին տակից են սատարում: ՀԱԿ-ի մի մասը հենց տակից է սատարում»,- այսօր «Peeplemeter» ակումբում ասաց Բ. Հարությունյանը:
Նորաստեղծ այս կուսակցությունը նախագահական ընտրություններում ոչ ոքի չի սատարելու, որովհետեւ ըստ Բ. Հարությունյանի, քաղաքական խորհրդի համագումարը նախատեսված է փետրվարին: Իսկ իր սեփական նախընտրությունից նա խուսափեց խոսել, միայն ակնարկեց. «Իշխանությանը իրականում հաջողվեց մանկական մատ անել երեք քաղաքական ուժերին: Սերժ Սարգսյանին պետք է դրա համար շնորհավորել: Կարող է հանրապետության նախագահը վաղը արթնանա ու որոշի, որ պետք է մենաշնորհներից զրկի, ես կգնամ կողջունեմ ու ուրախ կլինեմ ծառայել այս իշխանություններին»:
Կարդացեք նաև
«Առաքելություն» կուսակցության քաղխորհրդի անդամ Մանուկ Սուքիասյանն էլ՝ ակնարկելով Բ. Հարությունյանի կուսակցությանը, ասաց՝ անհասկանալի է քաղաքական ուժը, որը մտել է քաղաքական ասպարեզ ու կոնկրետ տեսակետ չունի ընտրությունների վերաբերյալ: Հետո էլ ասաց, որ իրենք ընտրությունների օրը բոլորին դեմ են քվեարկելու, ու դա բոյկոտ չէ, մասնակցության իրենց ճիշտ տարբերակն է:
Արփինե ՍԻՄՈՆՅԱՆ
