Քաղտեխնոլոգ Իգոր Մուրադյանն այսօր «Իրատես դե ֆակտո» ակումբում հայտարարեց, որ հացադուլը ոչ տղամարդկային մեթոդ է. «Ես դեմ եմ հացադուլներին: Տղամարդը, որը պայքարում է ինչ-որ իրավունքների համար, չպետք է կորցնի ֆիզիկական ուժը: Ես ասացի, որ պատրաստ եմ պաշտպանել ձեզ, մենակ թե դուրս եկեք այդ հացադուլից: Նա ինձ ասաց, որ ոչ, կարծես դա շատ կարեւոր պահ էր իր քաղաքական պայքարի: Ես չեմ հետեւում ուշադիր թեկնածուների ելույթներին: Ես չեմ զգացել, որ թեկնածուների գործունեության մեջ կա ինչ-որն օրիգինալություն: Բացառությամբ նրա, որ Րաֆֆի Հովհաննիսյանը իմիջ է ստեղծում տեխասային պատանու՝ իր ջինսերով, բլուզներով: Դե, վատ չէ, շատ հարմար, աշխատանքային հագուստ է: Նա բարեւում է մսավաճառներին, խորովածանոցներում ու վարսավիրանոցներում է լինում: Ուրիշ բան քարոզարշավում ես չեմ նկատել: Հրանտ Բագրատյանը անհեթեթություններ է ասում իր քարոզարշավի ընթացքում: Բացարձակ անհեթեթություն: Ես չգիտեմ, թե ում համար է աշխատում նա: Նրան ոչ ոք չի հասկանում, ո՛չ տնտեսագետները, ոչ սովորական մարդիկ: Դա այն լեզուն չէ: ԵՊՀ-ի դասախոսն ընդհանրապես կարո՞ղ է դա հասկանալ, ինչի՞ մասին է խոսքը: Այ, օրիգինալ մարդ է էպոսագետը: Ես հիանում եմ նրա համարձակությամբ, սկզբունքայնությամբ: Այլ, ավելի օրիգինալ թեկնածուների ես չգիտեմ»:
Թե ով կլինի մրցապայքարում երկրորդը՝ Իգոր Մուրադյանը չկարողացավ ասել, համենայնդեպս, նա վստահ է, որ ով էլ լինի, ավելի շատ ձայն կհավաքի, կան կհավաքեր Լեւոն Տեր-Պետրոսյանը. «Դա հնարավոր չէ ապացուցել: Այս իրավիճակը շատ ավելի հետաքրքիր է, քանի որ ավելի թարմ մարդիկ են մասնակցում: Գուցե կքվեարկեն էպոսագետի օգտին: Ես համարում եմ, որ Լեւոն Տեր-Պետրոսյանը հանցագործ է: Նրան պետք է արգելել մասնակցել առհասարակ ընտրություններին»:
Անդրադառնալով Պարույր Հայրիկյանի դեմ մահափորձին՝ քաղտեխնոլոգը վստահեցրեց, որ դա հենց մահափորձ էր, ոչ թե արվել էր վախեցնելու համար: Իգոր Մուրադյանի խոսքերով՝ «Հասարակությունը ձայն կտա նրան, ում հասկանում է: Դուք ծանո՞թ եք մի մարդու Հայաստանում, որ կարդա նրանց ծրագրերը: Ես չեմ կարդացել»,- ասաց նա՝ վստահեցնելով, որ ծրագրերը մեր երկրում էական դեր չունեն:
Հռիփսիմե ՋԵԲԵՋՅԱՆ
Հարգելի լրագրող,հոդվածի տեքստը չի համապատասխանում պրեամբուլային (վեռնագրին) և չի հասկացվում,թե ըստ քաղտեխնոլոգի,ով է հանցագործը`ԼՏՊ-ն,թե էպոսագետը???: Մի անգամ էլ ուշադիր կարդացեք Ձեր գրածը:
Այ,սա արդեն ուրիշ բան:Կարելի էր և ներողություն խնդրել!!!!!!!!!!