ՀՀ քրեական գործերով վերաքննիչ դատարանում Գրիշա Մելիք- Սարգսյանի նախագահությամբ, դատավորներ՝ Կարինե Ղազարյանի, Հենրիկ Տեր- Ադամյան, քիչ առաջ ավարտվեց անցյալ տարվա մայիսի 4-ին Հանրապետության հրապարակում, զանգվածային միջոցառման ժամանակ փուչիկների պայթյունի գործով մեղադրվող Սերոբ Բոզոյանի վերաքննիչ բողոքի հիման վրա հրավիրված դատական նիստը:
Հիշեցնենք, որ Սերոբ Բոզոյանը մեղադրվել է մեթանով լիցքավորված 7000 փուչիկների պայթյունի պատճառով 228 տուժողի մարմնական վնասվածքներ ստանալու համար:
Նա անցյալ տարվա հոկտեմբերի 17-ին Կենտրոն եւ Նորք-Մարաշ ընդհանուր իրավասության դատարանի կողմից դատապարտվել էր մեկ տարվա ազատազրկման:
Նկատենք, որ այսօր նրա պաշտպան Կարեն Մանուչարյանի վերաքննիչ բողոքի քննության ժամանակ դատական նիստերի դահլիճը դատարկ էր, չկային 228 տուժողները, ոչ էլ նրանց ներկայացուցիչները:
Կարդացեք նաև
Սերոբ Բոզոյանի պաշտպան Կարեն Մանուչարյանը դատարանում հայտնեց, որ առաջին ատյանում խախտվել է իր պաշտպանյալի նյութական եւ դատավարական իրավունքները, քրեական դատավարության օրենսգրքի խախտումներով կիրառելը ազդել է գործի ելքի վրա: Նա դատարանի ուշադրությունը հրավիրեց այն հանգամանի վրա, որ մեկ տարվա ազատազրկման է դատապարտվել ծանր, անբուժելի՝ քաղցկեղով հիվանդ մեկը: Նա նաեւ հայտնեց, որ առաջին ատյանը անտեսել է ապացույցը՝ Ֆանարջյանի անվան ուռուցքաբանության ինստիտուտի նրա հիվանդության մասին տված տեղեկանքը, բայց առաջին ատյանի դատարանը դատավճռում մեջ է բերել հիվանդության հետ առնչվող հետեւյալը. «Ամբաստանյալին խորհուրդ է տվել գտնվել տեղամասային օնկոլոգի հսկողության ներքո»:
Ըստ պաշտպան Կ. Մանուչարյանի, առաջին ատյանի դատարանը չի անդրադարձել Ս. Բոզոյանի՝ պատիժը կրելու նպատակահարմարությանը:
Մեղադրողը՝ ՀՀ գլխավոր դատախազության ընդհանուր հանցագործությունների գործերով վարչության դատախազ Սամվել Մկրտչյանն ասաց, որ առաջին ատյանը հաշվի է առել ամբաստանյալի հիվանդ լինելու հանգամանքը եւ որ համաչափ է պատժաչափը: Նա ասաց, որ մի բան է 1-2 անձի վնաս հասցնելը, մեկ այլ բան՝ 228-ին:
Նախագահող դատավոր Գ. Մելիք-Սարգսյանը փորձեց պաշտպանից իմանալ, թե ինչպես հասկանալ նրա պահանջը. մի դեպքում պաշտպանը միջնորդում է կիրառել ազատազրկման հետ կապ չունեցող պատիժ, մի դեպքում ասում է, որ մեկ տարի պայմանական չկիրառվի պատիժը:
Ընդ որում, դատավորն ասաց նաեւ, որ ազատազրկման հետ կապ չունեցող պատիժ կարող է լինել տուգանքը (ի դեպ, նախատեսված է 300.000-500.000 դրամ):
Ս. Բոզոյանը դատարանին խնդրեց մեկ տարի պայմանական չկիրառել իր պատիժը:
Մինչ դատարանը խորհրդակցական սենյակ կգնար, պաշտպան Կարեն Մանուչարյանը դատարանին հանձնեց Առողջապահության նախարարության Ֆանարջյանի անվան ուռուցքաբանության ինստիտուտի կողմից տրված Ս. Բոզոյանի՝ 2 վիրահատության ենթարկվելու տեղեկանքները:
Դատական նիստերի դահլիճից դուրս Aravot.am-ի հարցին, թե եթե դատարանը կիրառի տուգանք՝ կարո՞ղ եք վճարել, Սերոբ Բոզոյանն ասաց, որ ի վիճակի չէ, քանի որ չի աշխատում, իսկ հիվանդության հետ կապված թոշակ էլ դեռ չեն նշանակել:
Ռուզան ՄԻՆԱՍՅԱՆ
