![IMG_0719[1]](https://www.aravot.am/wp-content/uploads/2013/02/IMG_07191.jpg)
Նախագահի թեկնածուի հանդիպումը՝ Երեւանում
Այս պահին կառավարության շենքում՝ Մելիք Ադամյան 2 հասցեում, իսկական խառնաշփոթ է: Նախագահի թեկնածու Րաֆֆի Հովհաննիսյանի հետ հանդիպման են եկել նրա ընտրողներն ու համակիրները: Հանդիպումից հետո նախատեսված է Արտո Թունջբոյաջյանի համերգը:
Ինքը՝ Րաֆֆի Հովհաննիսյանը, ժամանեց քիչ առաջ: Նրան ընդունեցին ծափերով ու «Րա’ֆ-ֆի, Րա’ֆ-ֆի» վանկարկումներով:
Ելույթ ունեցան «Ժառանգության» փոխնախագահ Արմեն Մարտիրոսյանը եւ կուսակցության վարչության անդամ Անահիտ Բախշյանը: «Ես գիտեմ, որ եկել եք Րաֆֆի Հովհաննիսյանի տնտեսական ծրագիրը լսելու: Ես շատ ավելի կարեւոր բան ունեմ ասելու: Այսօր այս ստվար, իրար ուս ուսի տված, մեծ խտությամբ այս սրահում կանգնել ենք, որպեզի իրար թիկունք զգանք, որ հավատանք, որ մեր «Ժառանգություն» կուսակցության առաջնորդ Րաֆֆի Հովհաննիսյանի առաջնորդությամբ հաղթելու ենք: Հաղթելու է մեր վախը, մեր մեջի ստրուկը: Հաղթելու ենք մեր հայրենասիրությամբ, մեր ազնվությամբ: Մենք հաղթելու ենք, որովհետեւ ուժեղ ենք եւ աստվածահաճո նպատակներ ունենք: Մենք ուժեղ ենք, մենք անկոտրուն ենք, մենք պաշտպանելու ենք յուրաքանչյուր քվե, որ կա Րաֆֆի Հովհաննիսյանի անվան դիմաց»,-ասաց տիկին Բախշյանը:
Կարդացեք նաև
Րաֆֆի Հովհաննիսյանն իր ելույթի սկզբում ներկաներին հորդորեց նայել այսօր իր հարցազրույցը՝ Հանրային հեռսւոտատեսությամբ. «Ես Նվեր Մնացականյանի հյուրն էի: Նա ինձ հարցրեց՝ ինչո՞ւ են սակավամարդ ձեր հանդիպումները»: Սա լսելուն պես ներկաները գոռացին՝ «ամո՛թ իրան»:
Րաֆֆի Հովհաննիսյանը շարունակեց իր պատասխանը. «Հայ ժողովրդի մեծամասնությունը գալիս է հետ բերելու իր երկիրը, Սահմանադրությունը: Տասը տարեկան էի, պապիկս՝ Գասպարը, ինձ նամակ գրեց, բովանդակությունը ձեզ հետո կպատմեմ, այն ինչ ցեղասպանություն տեսած իմ պապիկը փոխանցեց փոքրիկ Րաֆֆիին: Այնտեղ կա մեծ Րաֆֆիի պատգամը՝ փոքր Հայաստանը մեծի վերածելու, կիսանկախը վերածելու միացյալի, անարդարը՝ արդարի: Այսօր հավաքվել ենք պայքարի կեսին թե առաջին քայլում, թե վերջնախաղում՝ ասելու համար, որ խաղ չկա հայ ժողովրդին ու Հայաստանի քաղաքացու առջեւ»:
Հռիփսիմե ՋԵԲԵՋՅԱՆ
