Դատավորը նրան մեղմ պատժի է դատապարտել
Տավուշի մարզի առաջին ատյանի դատարանում ավարտվել է ոստիկանության Իջեւանի բաժնի պետի նախկին տեղակալ, 1965թ. ծնված Սայադ Սարգսյանի դատավարությունը:
Դատարանն ապացուցված է համարել այն, որ Ս. Սարգսյանը 2012թ. հուլիսի 8-ին հանդիսանալով ոստիկանության Իջեւանի բաժնի պատասխանատու, ոստիկանության շենքում իրեն օգնության համար դիմած Արմավիրի մարզի Մեծամոր քաղաքի մի բնակչուհուց տեղեկացել է, որ հուլիսի 6-ին Սարիգյուղի մի բնակիչ ծեծի է ենթարկել նրան, որից հետո Ս. Սարգսյանը իր ստորադաս աշխատակիցների միջոցով բաժին է հրավիրել սարիգյուղացուն եւ հաշտեցնելու նպատակով կազմակերպել նրա եւ այդ կնոջ հանդիպումը:
Ս. Սարգսյանը կատարված դեպքի վերաբերյալ հաղորդում չի ընդունել, հանցագործության դեպքը չի գրանցել, որի պատճառով այն տեւական ժամանակ մնացել է չբացահայտված:
Կարդացեք նաև
Դատարանում Ս. Սարգսյանը հայտնել է որ համաձայն է առաջադրված մեղադրանքի հետ եւ միջնորդել է անցկացնել արագացված դատաքննություն: Այդ միջնորդությունը բավարարվել է: Փետրվարի 4-ին Տավուշի մարզի առաջին ատյանի դատարանի դատավոր Ռաֆիկ Մելքոնյանը վճռել է ՀՀ քրեական օրենսգքրի 308 հոդվածի առաջին մասով («Պաշտոնական լիազորությունները չարաշահելը») Սայադ Սարգսյանին դատապարտել 200 հազար դրամ տուգանքի:
Ոսկան ՍԱՐԳՍՅԱՆ
