Րաֆֆի Հովհաննիսյանը դեռ մինչեւ քարոզարշավը նամակով դիմել էր ՀՀ նախագահին՝ նախագահական ընտրությունները օրինական անցկացնելու համար: Նախագահը պարոն Հովհաննիսյանի նամակին անձամբ չի պատասխանել: ՀՀԿ խոսնակի կողմից հավաստիացումներ են եղել, որ այդպես էլ լինելու են:
Չնայած դրան, Րաֆֆի Հովհաննիսյանի նախընտրական շտաբի ներկայացուցիչերը այսօր «Նոյյան տապան» ակումբում փաստեցին, որ հայտնաբերել են շուրջ 30 խախտում:
Րաֆֆի Հովհաննիսյանի նախընտրական շտաբի իրավաբան Կարեն Մեժլումյանի խոսքերով՝ նախընտրական քարոզչական պաստառներ են փակցվել այնպիսի վայրերում, որտեղ արգելված է՝ տեղական եւ ինքնակառավարման մարմինների, հասարակական սննդի, առեւտրի կետերի, հասարակական տրանսպորտի վրա. «Մեր կողմից բազմաթիվ լուսանկարներ են արվել, որոնցից երեւում է, որ ե՛ւ պետական շենքերի վրա կան՝ տեղական ինքնակառավարման մարմինների, եւ բազմաթիվ խանութների վրա՝ Ապարանում, Երեւանում: Հատկապես շատ են Ազատության պողոտայի վրա՝ Լամբադա կամրջից մինչեւ «ԱրմենՏել» հատվածում: Ազատության պողոտայում դրոշի ձեւով պաստառների շքերթ է կարծես թե: Ապարանում սուպերմարկետ կա, որի բոլոր ապակիների վրա կան պաստառներ: Կան փոքր ձկան խանութներ, վրան գրված «իշխան» եւ տակը՝ քարոզչապաստառը»:
«Ժառանգության» մամուլի խոսնակն ընդգծեց, որ այս բոլոր խախտումներով պաստառները վերաբերվում են ՀՀ գործող նախագահին:
Կարդացեք նաև
Հովսեփ Խուրշուդյանը նշեց, որ այլ խախտումներ էլ կան, բայց ահազանգերն անանուն են: Զանգեր կան դպրոցներից. «Գիտենք, որ մի դպրոցի դեպքում ԿԳ նախարարը դիմել էր մարզպետին, քանի որ ՏԻՄ-ին են պատկանում դպրոցները, նրան էր դիմել՝ վարչական տույժ կիրառելու: Այդ մի դեպքն էր, մնացած դեպքերում տեսնում ենք, որ որեւէ արձագանք չկա: Մեկ դեպքը ավելի շատ ձեւական բնույթ ուներ, քան նպատակ ուներ նման այլ դեպքեր»: Նա նշեց, որ նման խախտումներ կան Մասիսում, Արարատում եւ այլ տեղերում:
Մալաթիա-Սեբաստիայում խոչընդոտել են շենքերում քարոզչանյութեր տարածելը: Իրավաբանների միջամտության շնորհիվ նոր խոչընդոտը վերացել է: Գյուղեր են եղել, որտեղ վստահեցրել են, որ պետք է հատուկ տեղեր հատկացվեն՝ քարոզչանյութերի փակցման համար:
Այս բոլոր խախտումների հետ կապված Րաֆֆի Հովհաննիսյանի նախընտրական շտաբի անդամները տեղյակ կպահեն ԿԸՀ-ին: Նրանք պահանջում են խախտումների հետ կապված քաղաքական գնահատական եւ դրանից բխող քաղաքական գործողություններ:
Հռիփսիմե ՋԵԲԵՋՅԱՆ
