Ակտիվիստը Խոսրովի արգելոցում որսագողության գործով վկա է
Քիչ առաջ տեղեկացրել էինք, որ բնապահպան ակտիվիստ Եղիա Ներսեսյանին ոստիկանություն բերման են ենթարկել:
Aravot.am-ի հետ զրույցում Եղիա Ներսեսյանն ասաց, որ անհանգստանալու կարիք չկա, պարզապես նա «Խոսրովի արգելոցի» դատական գործով վկա է եւ այս պահին ոստիկանները նրան տանում են Արարատի եւ Վայոց Ձորի մարզերի ընդհանուր իրավասության դատարան. Նրան ոստիկանություն չեն տարել:
Մեր հարցին, թե արդյոք պատշաճ ծանուցում չի՞ ստացել դատարան ներկայանալու համար, Եղիան պատասխանեց, որ իրեն դատարանի աշխատակազմից տեղեկացրել էին, որ այսօր դատական նիստը չի կայանալու, այդ պատճառով էլ ինքնուրույն չի ներկայացել. «Դիտավորություն չի եղել, եւ անհանգստանալու առիթ էլ չկա: Առավոտյան ինձ բերման ենթարկելու հրաման բերեցին, հիմա գնում ենք դատարան»:
Կարդացեք նաև
Եղիա Ներսեսյանի փաստաբան Տիգրան Եգորյանն էլ մեզ հետ զրույցում ասաց, որ անհասկանալի է, թե ինչու են դատարանից նման բան ասել, թե նիստը չի կայանալու: Եղիան նպատակ էլ չի ունեցել չներկայանալ նիստին: Փաստաբանի խոսքերով` «Խոսրովի անտառ» արգելոցում որսագող Նորիկ Սարգսյանին առաջադրված մեղադրանքի գործով Եղիա Ներսեսյանը վկա է:
Հիշեցնենք, որ բնապահպան ակտիվիստները նախորդ տարի սեպտեմբերի 18-ին արշավի էին գնացել Խոսրովի արգելոցի Կաքավաբերդի տեղամաս, որտեղ հայտնաբերել էին խարույկի հետքեր, խորովածից հետո մնացած կենցաղային աղբ, օղու դատարկ շշեր, մի քանի կենդանու մասնատված եւ մորթված դիակներ, կենդանիներին ծառից կախելու երկաթե պարան: Ակտիվիստները հայտնաբերել էին նապաստակի, կովկասյան գորշ արջի, բեզոարյան այծի դիակի մնացորդներ, որոնք ակտիվիստները լուսանկարահանել եւ տեսանկարահանել էին:
Նելլի ԲԱԲԱՅԱՆ
Լուսանկարը՝ արխիվային
