«Ես Տիրոջ կամքով ողջ մնացի։ Հրեշտակները չթողեցին, որ դա կատարվի», հայտարարել է Պարույր Հայրիկյանը՝ անդրադառնալով իր նկատմամբ իրականացված մահափորձին։
«ՉԻ» – Փաստորեն, չարաբաստիկ այդ օրը Երեւանի կենտրոնում լուրջ առճակատում է տեղի ունեցել ԿԳԲ-ի գործակալների եւ հրեշտակների միջեւ, ընդ որում՝ հանդիպումը, կարելի է ասել, ավարտվել է ոչ-ոքի, որովհետեւ հրեշտակներն այնուամենայնիվ թույլ են տվել, որ Պարույր Հայրիկյանը մի թեթեւ վիրավորվի (կարող էին, չէ՞, դա էլ թույլ չտալ):
Ցավոք, Հայրիկյանը լավ չի հիշում իր վրա կրակողի դիմագծերը, բայց դա պրոբլեմ չէ. գուցե կարողանա հրեշտակների՞ դիմագծերը հիշել։ Ոստիկանությունը ֆոտոռոբոտներ կկազմի, կհայտնաբերի նրանց եւ որպես վկա կներգրավի գործում: Եթե, իհարկե, տուժողը «հրեշտակ» ասելով ինքն իրեն նկատի չունի։ Համենայն դեպս՝ մի երկու օր առաջ նա ասում էր, որ կրակողը վրիպել է, որովհետև ինքն է նրան խանգարել։ Այնպես որ՝ հրեշտակի ֆոտոռոբոտը կարող է շատ նման լինել Հայրիկյանին։ Չնայած՝ դա ֆոտոռոբոտի հետ կապ չունի։ Էլ ի՞նչ հրեշտակ, որ արտաքինով Պարույր Հայրիկյանին նման չլինի:
«Չորրորդ ինքնիշխանություն»
