Այսօր «Նոյյան Տապան» լրատվական կենտրոնում ՀՀ նախագահի թեկնածու, էպոսագետ ներկայացող Վարդան Սեդրակյանը խոսելով նախագահի մեկ այլ թեկնածու Պարույր Հայրիկյանի մասին, ասաց. «Չեմ զարմանա, եթե ընտրություններից հետո Հայրիկյանը հայտնվի ԱԺ-ում պատգամավորի պաշտոնում»:
Էպոսագետը նշեց, որ նա այդ դեպքից առաջ տված հարցազրույցում ասել էր, որ եթե թեկնածուներից մեկի համար անհաղթահարելի խոչընդոտներ են լինում, ապա պետք է ամբողջ ընտրական գործընթացն անվավեր համարել:
«Նախընտրական քարոզարշավը վերածվել է շուկայական հարաբերությունների, ժամանակի ընթացքում կհամոզվեք, որ Հրանտ Բագրատյանն ու Րաֆֆի Հովհաննիսյանը առաջադրվել են գործող նախագահի հետ պայմանավորվածության արդյունքում»,- այս կարծիքին է էպոսագետը:
Ըստ նրա` հաշվի առնելով Պարույր Հայրիկյանի նախնական հարցազրույցն ու մահափորձից հետո նրա պահվածքը` «համոզված եմ այստեղ գործարք է եղել»:
Կարդացեք նաև
Էպոսագետի խոսքով, Հայրիկյանի դեպքը խոչընդոտ չի հանդիսացել իր համար, ու չի ազդել իր վարկանիշի վրա. «Ես իմ պատվավոր տեղում եմ, ինչ էլ լինի, եթե նույնիսկ իրար խորոված էլ անեն, ես իմ տեղում եմ մնալու»,- ասաց Սեդրակյանը հավելելով, որ ընտրություններից հետո ինքը երդման արարողությամբ է զբաղվելու եւ այս դեպքում ուրիշ տարբերակ չի էլ կարող լինել:
Սեդրակյանի խոսքով` եթե Հանրապետական կուսակցությունն ու Սերժ Սարգսյանը կարծում են, թե իրենք որոշում երկրի ապագան, ապա չարաչար սխալվում են:
Եվա ՀԱԿՈԲՅԱՆ
