Հունվարի 25-ին Վճռաբեկ դատարանը հետ է ուղարկել Հայ Ազգային Կոնգրեսի
չորս ակտիվիստներ Տիգրան Առաքելյանի, Արտակ Կարապետյանի, Սարգիս
Գեւորգյանի եւ Դավիթ Քիրամիջյանի գործով բողոքը եւ տրամադրել 20 օր նոր
բողոք ներկայացնելու համար: Եթե Վճռաբեկ դատարանը, կատարելով Սերժ
Սարգսյանի՝ դատական իշխանությանը իջեցրած հրամանը, ուժի մեջ թողնի վերոհիշյալ ակտիվիստներին համապատասխանաբար 6, 3, 2 եւ 2 տարով
ազատազրկելու որոշումը, մենք Հայաստանում կունենանք չորս քաղբանտարկյալ:
Ազատազարկված Տիգրան Առաքելյանը եւ դեռ ազատության մեջ գտնվող երեք մյուս տղաները ըստ էության, պատանդ են դարձել իշխանությունների ձեռքում, որոնք փորձում են արդարադատության համակարգը օգտագործել որպես ընդդիմության վրա ազդելու քաղաքական գործիք:
Հարցը արդեն պաշտոնապես բարձրացնում է միջազգային այնպիսի հեղինակավոր կազմակերպություն, ինչպիսին է Հյուման Ռայթս Ոտչը (Human Rights Watch), եւ տղաների անունները արդեն հնչում են ԵԽԽՎ-ի լիագումար նիստերում որպես ապացույց որ Հայաստան խախտում է մարդու իրավունքները եւ քաղբանտարկյալներ ունի: Տղաների ազատությունն են պահանջում նաեւ Հայաստանի բոլոր իրավապաշտպան կազմակերպությունները: Արդյոք ժամանակը չէ հասկանալու համար, որ Տիգրան Առաքելյանի պահելով
բանտում, դուք թունավորում եք քաղաքական մթնոլորտը Հայաստանում եւ
ընդամենը ապացուցում եք, որ Հայաստանում տիրում է քինախնդիր եւ ողորմելի
մի բռնապետություն, որը վախենում է անգամ մի քանի համարձակ
ակտիվիստներից:
Հանուն այդ քինախնդրության դուք պատրաստ եք թուլացնել Հայաստանի
միջազգային վարկը եւ դիրքերը կարեւորագույն միջազգային կառույցներում:
Սթափվեք, ազատեք տղաներին այդ բռնաճնշումներից եւ վերջ դրեք պատանդների առեւտրի այս խայտառակ քաղաքականությանը:
Կարդացեք նաև
Լևոն Զուրաբյան
«Հայ Ազգային Կոնգրես» խմբակցություն
5 փետրվարի, 2013թ.
Ազգային Ժողով
