Այսօր «Հայելի» ակումբում նախկին քաղբանտարկյալ Ազատ Արշակյանը, խոսելով ՀՀ նախագահի թեկնածու Պարույր Հայրիկյանի մահափորձի մասին, կարծիք հայտնեց, թե կատարվածը քաղաքական պրովոկացիա է. «Բարեբախտաբար Հայրիկյանը ողջ մնաց, Հայաստանի Հանրապետությունը, պլյուսացնելով մինուսները, դուրս կգա հաղթանակած, եւ կարծում եմ` իշխանություններն էլ դուրս կգան հաղթանակած: Ինչ վերաբերվում է կատարվածի վերաբերյալ Հայրիկյանի հայտարարությանը, ապա հաշվի առնելով այն հանգամանքը, որ նա ֆիզիկապես վիրավորված էր, նրա հայտարարությունների որոշ մասի խստությունը վերագրում եմ նրա բորբոքված լինելուն»:
Արշակյանի խոսքով`Հայրիկյանի մահափորձն իրականացնողը մոլագար է եղել, եւ դա ոչ մեկին էլ ձեռնտու չէ. «Գուցե դա քաղաքական մոլագարի արած գործ է: Ովքեր գիտեն Հայրիկյանի կենսագրությունը, գիտեն, որ նրան վախեցնելու համար չէին կրակի, նա վախեցող չէ: Այսօր տարբեր վարկածներ են շրջանառվում Հայրիկյանի մահափորձի հետ կապված: Բայց ես, ճանաչելով Հայրիկյանին, բացառում եմ այն վարկածը, որ մահափորձն իր կազմակերպածն է, համոզված եմ՝ նա չէր ուզենա իր կյանքը փորձարկել»:
Եվա ՀԱԿՈԲՅԱՆ
