Կենտրոն եւ Նորք-Մարաշ վարչական շրջանների ընդհանուր իրավասության դատարանում դատավոր Գագիկ Պողոսյանի նախագահությամբ այսօր պետք է շարունակվեր Արթուր Ղալումյանի նկատմամբ հարուցված քրեական գործով դատական վիճաբանություների փուլը:
Պաշտպանական եւ մեղադրական ճառերով հանդես պետք է գային դիլիջանցի ամբաստանյալի պաշտպանն ու մեղադրանքը պաշտպանող դատախազը: Ի դեպ, Ա.Ղալումյանի պաշտպանությունն իրականացնում էր ճանաչված փաստաբան Անահիտ Եսայանը, որն այլեւս հանրային պաշտպանի գրասենյակի փաստաբան է:
Ըստ մեղադրանքի, Արթուր Ղալումյանը միջնորդի միջոցով փորձել է առանձնապես խոշոր չափերի կաշառք տալ:
Նա 2011 թվականի դեկտեմբերի 5-ից ազատված լինելով ճանապարհային ոստիկանության ճանապարհապարեկային ծառայության 2-րդ սպայական գումարտակի 4-րդ սպայական վաշտի հրամանատարի տեղակալի պաշտոնից և գրանցված լինելով ՀՀ ոստիկանության կադրերի ռեզերվում, կրկին պաշտոնի նշանակվելու համար 2012 թվականի հունիսի 28-ին ծանոթացել է Արթուր Հակոբյանի և Արամ Մկրտչյանի հետ: Վերջիններս մոլորության մեջ են գցել նրան: Փախուստի մեջ այսօր գտնվող Ա.Հակոբյանն ու Ա.Մայիլյանը Ղալումյանին հավատացրել էին, թե ՀՀ ոստիկանապետ Վովա Գասպարյանի գլխավոր խորհրդական Հայկարամ Ստեփանյանը 30.000 ԱՄՆ դոլար կաշառքի դիմաց կարող է օգնել նրան՝ ճանապարհային ոստիկանության վերոհիշյալ գումարտակում վաշտի հրամանատարի պաշտոնում նշանակվելու հարցում։
Կարդացեք նաև
Գումարը Արթուր Ղալումյանը տվել է Արթուր Հակոբյանին անձամբ, նախ, 25.000 դոլարի չափով, ապա հաջորդ օրը՝ 5.000 ԱՄՆ դոլարի:
Ա. Հակոբյանը և Ա. Մկրտչյանը տիրացել են 30.000 ԱՄՆ դոլար գումարին:
Այսօր դատարան պետք է ներկայացվեին Ա.Ղալումյանի խնամքի տակ գտնվողների տվյալները, որոնք տրվել էր Դիլիջանի քաղաքապետրանի կողմից: Սակայն ըստ պաշտպանի՝ դատարանում արված հայտարարության, տեխնիկական սխալ էր տեղի ունեցել, ինչի պատճառով նա խնդրեց մեկ օրով հետաձգել դատական նիստը: Մեղադրողը չառարկեց:
Դատական նիստը նշանակվեց փետրվարի 8-ին:
Ռուզան ՄԻՆԱՍՅԱՆ
