«Հայրիկյանի դեմ մահափորձը հանրության համար ամենակարեւոր եւ քննարկվող թեմաներից մեկն է: Ոչ մի երկրում բացառված չեն նմանատիպ քաղաքական զարգացումները»,-այսօր լրագրողների հետ հանդիպման ժամանակ նախագահի թեկնածուի դեմ կատարված մահափորձի վերաբերյալ նշեց «Կովկաս» ինստիտուտի փոխտնօրեն, քաղաքագետ Սերգեյ Մինասյանը:
Նրա համոզմամբ՝ ավելի նպատակահարմար կլինի չերկարացնել ընտրությունները եւ ներկա իրավիճակը օգտագործել ավելի արդյունավետ՝ պայքարը շարունակելու համար:
«Մահափորձն իր նպատակին չհասավ, բոլոր քաղաքական ուժերը նույնատիպ գնահատականներ տվեցին՝ սպեկուլյացիաների ալիք չեմ տեսել: Մի մարդ, որի վրա կատարվել է մահափորձ, դժվար թե կարողանա եղածը հստակ ներկայացնել: Սահմանադրությունը հնարավորություն է տալիս երկու շաբաթով երկարաձգելու ընտրությունների ընթացքը, սակայն կարծում եմ, որ պրն Հայրիկյանի համար ավելի նպատակահարմար կլինի շարունակել պայքարը»:
Քաղաքագետի պնդմամբ՝ այս իրադարձությունը ֆորս-մաժորային էր, դա ձեռնտու չէր գործող նախագահին եւ մյուս մրցակիցներին.
Կարդացեք նաև
«Արդարության սկզբունքը պահպանվում է՝ խախտվել է միայն վերջին իրադարձություններից առաջ: Լուրջ պայքար չկա, սակայն ինֆորմացիոն դաշտում բոլոր թեկնածուները գործում են այն ռազմավարության շրջանակում, ինչը որ որոշել էին: Ըստ իս՝ բացառությամբ մի քանի թեկնածուների, մնացածը մասնակցում են զուտ մասնակցելու համար»:
Անժելա ՇԱՀՈՒՄՅԱՆ
