«Խոստովանեմ՝ հաճելի է տեսնել, թե ինչպես է մեր գործընկերը՝ Պարույր Հայրիկյանը արագ ապաքինվում, չնայած այն զազրելի հանցանքին, որը, իմ համոզմամբ՝ ուղղված էր ոչ միայն Հայրիկյանի դեմ, այլ մեր պետականության դեմ, մեզնից յուրաքանչյուրի դեմ»,- Մասիսի մշակույթի տանը այսպես սկսեց իր խոսքը ՀՀ նախագահի թեկնածու, գործող նախագահ Սերժ Սարգսյանը, հավելելով, որ պետք է շարունակել անխափան, հստակ աշխատանքը, որովհետեւ այդ հանցագործության նպատակը հենց դա էր՝ «խափանել մեր բնականոն աշխատանքը»:
Նախագահն ասաց, որ ստեղծված իրավիճակում գործելու է բացառապես ՀՀ Սահմանադրությունը եւ ինքը իբրեւ Սահմանադրության երաշխավոր, խոստացավ, որ յուրաքանչյուր գործողություն համապատասխանելու է երկրի հիմնական օրենքի տառին ու ոգուն:
Սերժ Սարգսյանը նաեւ կարծիք հայտնեց, որ Պարույր Հայրիկյանի հետ կատարվածը փորձություն էր ու այդ փորձությունից Հայաստանն ու հայ ժողովուրդը պետք է դուրս գան առավել միասնական: Մասիսցիների հետ նաեւ նախագահն անկեղծացավ. «Պարտավոր ենք լավ ընտրություն անցկացնել: Դա օդ ու ջրի պես մեզ անհրաժեշտ է, որպեսզի ունենանք ամուր իշխանություն՝ ընտրված նախագահ, որի ընտրությունը կասկած չի հարուցում»:
Բացի այդ, Սերժ Սարգսյանը նաեւ ասաց, որ յուրաքանչյուր քվե էլ ավելի է ամրացնում Հանրապետականի դիրքերը, իսկ յուրաքանչյուր պակաս տրված քվե, բնականաբար, թուլացնում է այն:
Կարդացեք նաև
Ի դեպ, նախագահը դեռ վատառողջ է, չնայած դրան, քարոզարշավը շարունակում է:
Իսկ Արարատի մարզը նախագահի թեկնածու Սերժ Սարգսյանին դիմավորեց «Արարատի մարզը ողջունում է ՀՀ նախագահի թեկնածու Սերժ Սարգսյանին» պաստառով: Մասիսի երաժշտական դպրոցում նախագահի հետ հանդիպման համար հավաքվել էին տեղական ինտելիգենցիայի ներկայացուցիչները: Aravot.am-ի հետ զրույցում գյուղապետերից մեկը, որը չցանկացավ ներկայանալ, այսպես խոսեց. «Եկել ենք մեր թագավորին տենանք: Ես ոչ անուն ունեմ, ոչ ազգանուն, էդ իմ գործն ա, էկել եմ թագավորին տենալու»: Կազմակերպիչներից մեկի հետ փորձում էինք ճշտել, թե ինչ սկզբունքով են հրավիրվել հանդիպման մասնակիցները: Վերջինս երկար մտածելուց հետո ասաց. «Սաղ քաղաքն էլ ուզում էր գար, ով շուտ ա էկել՝ էն էլ մտել ա ու նստել»: Ի դեպ, դահլիճում ներկաների հագուկապից ակնհայտ էր, որ այդտեղ պատահական մարդիկ չկան: Իսկ նրանք, ովքեր իսկապես ինքնաբուխ եկել էին նախագահին տեսնելու, նրա հետ զրուցելու, այդպես էլ մնացին դահլիճի պատերից այն կողմ եւ հնարավորություն չստացան նախագահի հետ շփվելու:
Նելլի ԳՐԻԳՈՐՅԱՆ
Ես մտածում եմ, երբ ի վերջո կփոխվի հայ ազգի մտածելակերպը. Հարգելիներս. Սերժ Սարգսյանը ոչ թե թագավոր է ու մենք պետք է ծառայենք նրան, այլ ժամանակն է ընտրել մեր երկրի իսկական նախագահին, ով ինքը կծառայի ժողովրդին.